Қызылордада малдың қысқы қорегі жартылай дайын. Қажет делінген 769,9 мың тонна шөптің 392,5 мың тоннасы орылып, бауланды. Облыстық ауыл шаруашылығы басқармасының басшысы Талғат Дүйсебаевтың айтуынша, жұмыс қарқынды түрде жалғасып жатыр.
– Арнайы жоспарға сәйкес барлық ауданның үлесі анықталды. Штабтар құрылып, шабындықтар көлемі белгіленді. Ауылдарда 114 бригада құрылып, оған 170 техника, мыңнан астам адам жұмылдырылды. Бүгінгі күні өңірде жағдай толық қалыпқа келді, мал шығыны тіркелген жоқ, – дейді ол.
Сала жетекшісінің жағдай деп отырғаны – құрғақшылық мәселесі. Аралдық ағайынды 560-қа жуық түлігінен айырған табиғи құбылыс аудан шекарасынан асып, аймақ халқын да абыржытқаны рас. Үкімет төтенше жағдай жариялап, қолдау көрсетті. Жергілікті деңгейде шұғыл көмек ұйымдастырылып, ол әлі жалғасуда.
Мал қорегін қымбаттатпау, шаруалардың одан шет қалмауы үшін тауар өндірушілер шығынын ішінара арзандату бағытын субсидиялауға республикалық бюджет резервінен 1,7 млрд теңге бөлінді. Бүгінгі күні облыс әкімдігі қаулысының жобасы дайындалуда. Министрліктің келісімімен «Азық-түлік келісімшарт» компаниясы арқылы 7,4 мың тонна жем солтүстік облыстардан жеңілдетілген бағамен сатып алынады. Жергілікті тауар өндірушілерге 3,8 мың тонна жеңілдетілген дизель тиесілі.
– Облыс әкімінің резервінен 250 млн теңге бөлінді. Оның 49,5 млн-ы тасымал шығынын жабуға, 200,5 млн-ы суат, жайылым, шабындықтар мен Қамыстыбас, Ақшатау көлдері жүйелерін суаруға бағытталып отыр. Кәсіпкерлер, фермерлер, түрлі қайырымдылық қорлары барлық жағынан қолдау көрсетуде. Болат Өтемұратов қоры арқылы 213 млн теңге бөлінді. Ол аудандағы әлеуметтік жағынан аз қамтылған 1322 отбасына 900 тонна жем-шөп алып беруге, жайылымдықтарды суландыратын жабдықтар, су тасымалдау көлігін, су сорғыларын сатып алуға, гидротехникалық құрылыстарды жөндеуге, ұңғыма салуға жұмсалмақ, – деді басқарма басшысы.
Мал шаруашылығын қолға алған кәсіпкерлерге мемлекет тарапынан қай кезде де қолдау бар. Соның бірі – «Аграрлық несие корпорациясы» мен «Ауыл шаруашылығын қаржылай қолдау қорының» жеңілдетілген несиелері Ол несие көлеміне қарай 7 жылдан 12 жылға дейінгі мерзімде, 2 жылдық каникулымен беріледі. Ал ірі инвестициялық жобалар «Байқоңыр» корпорациясының қолдауымен жүзеге асырылады.
Мамандардың пайымынша, мемлекет қолдауы мал басы мен шаруашылық өнімін өндіру көлемінде өсу динамикасының қалыптасуына мүмкіндік берді. Өткен жылдың шілдесімен салыстырғанда биыл 7 айда сиыр – 7, қой мен ешкі – 5,6, жылқы 13,6, түйе басы 8,1 процентке көбейді. Ет – 3,5, сүт – 1,9, жұмыртқа өндірісі 20,2 процентке жоғарылады.
Назерке Саниязова,
«Сыр бойы»
>>> Біздің Facebook, Instagram парақшаларымыз бен Telegram каналымызға жазылыңыз! <<<
