«Сыбайлас жемқорлыққа қарсы күрес жүргізу – мемлекетте тұрақтылықты қамтамасыз етудің қажетті шарты. «Кез келген мемлекеттік құрылыстағы басты нәрсе – заңдарды лауазым иелері баю жолына түсіп кетпейтіндей етіп ұйымдастыру. Жалпы жұртқа ортақ пайда келуін ойластыратын мемлекеттік құрылыстар ғана әділ, дұрыс болмақ» деген екен ойшыл, ғалым Аристотель.
Сыбайлас жемқорлыққа қарсы күрес – бүгінгі күнгі күрделі мәселелердің бірі. Үлкен әлеуметтік қасірет болып табылатын бұл дерт саяси даму тұрғысынан бір-біріне ұқсамайтын әлемдегі барлық елдердің қай-қайсысын да қатты алаңдататыны айқын.
ҚР «Сыбайлас жемқорлыққа қарсы күрес туралы» Заңның басты мақсаты – азаматтардың құқықтары мен бостандықтарын қорғау, сыбайлас жемқорлық көріністерінен туындайтын қауіп-қатерден ұлттық қауіпсіздікті қамтамасыз ету, жемқорлыққа байланысты құқық бұзушылықтың алдын алу, олардың жолын кесу және ашу. Осы заңда, мемлекеттік міндетті атқаратын және оларға теңестірілген адамдардың лауазымдық өкілеттігін, мүмкіндіктерін пайдалана отырып, пайда табуы сыбайлас жемқорлық деп анықталған.
Әрбір қоғам дамуының күнгей жағымен қатар көлеңкелі тұсы да бар. Елдің әлеуметтік хал-ахуалының жақсарып, экономикалық жоғары даму деңгейіне жетуі мен халқымыздың демографиялық өсіп-өнуін көздеген шаралар кезінде алға басқан қадамды кейін тартып, дамуымызға тежеу болатын сыбайлас жемқорлыққа қарсы күрес – азаматтық парызымыз.
Әсем ТЫНАРБАЙ,
облыс бойынша экология
департаментінің
бас маманы
>>> Біздің Facebook, Instagram парақшаларымыз бен Telegram каналымызға жазылыңыз! <<<
