Бүгін ҚР Президенті Қасым-Жомарт Тоқаевтың «Жаңа Қазақстан: жаңару мен жаңғыру жолы» атты Жолдауында айқындалған міндеттерді талқылауға арналған облыстық актив жиыны өтті.
Облыс әкімі Гүлшара Әбдіқалықованың төрағалығымен өткен актив отырысына қала әкімі, басқарма басшылары, мәслихат депутаттары, ардагерлер, зиялы қауым және қоғамдық ұйым мен БАҚ өкілдері қатысты.
Аудан әкімдері онлайн байланыс арқылы қатысу мүмкіндігіне ие болды. Жиынды ашқан аймақ басшысы бұл Жолдаудың мән-маңызы айрықша, арқалайтын жүгі бір жылмен шектелмейтінін, ауқымы кең, мазмұны бөлек екеніне тоқталды.
Алдағы уақытта жүзеге асырылатын саяси реформалардың жаңа бағдарламасы мен әлеуметтік экономикалық бағытта атқарылатын іс-шаралар, ішкі- сыртқы саясат, қауіпсіздік мәселелері айқындалғанын айтты.
– Ел Президенті саяси реформалардың он бағытын нақтылап берді. Бірінші – Президенттің өкілеттілігі туралы. Мемлекет басшысы суперпразиденттік мемлекеттен басқару парламенті бар жолға көшуді айтты. Осы орайда күшті президент, ықпалды парламент, есеп беретін Үкімет қағидаты басшылыққа алынады. Президент конституциялық кеңес, есеп комитеті, орталық сайлау комиссиясы партиядан тыс болады. Облыс әкімдері мен олардың орынбасарлары партия филиалдарын басқармайды. Екінші – өкілді билік тармағын қайта құру. Енді президенттің өкілеттілігін біртіндеп қысқарта отырып, парламенттің рөлі айтарлықтай артатын болады. Сол арқылы мемлекетіміздің институционалдық тұғыры нығаймақ. Үшінші –сайлау жүйесін жетілдіру. Саяси жүйенің басты мақсаты – азаматтардың мемлекетті басқару ісіндегі рөлін арттыру. Осы орайда мемлекет басшысы мәжіліс, мәслихат сайлауларына партияда жоқ азаматтардың да қатысуына мүмкіндік беріп , аралас сайлау жүйесіне көшуді ұсынды, – дей келе облыс әкімі Президент нақтылап берген бағыттардың барлығына тоқталып, саралап берді. Жолдаудан туындайтын міндеттер мен тапсырмалардың орындалуын орынбасарлары мен басқарма басшыларына тапсырды.
Актив отырысында облыстық мәслихат хатшысы Наурызбай Байқадамов, облыстық мәслихат депутаты, «Сыр медиа» ЖШС бас директоры Аманжол Оңғарбаев, «Далатех» тігін фабрикасының директоры Дінмұхамед Абызов, неміс этномәдени бірлестігінің белсендісі Светлана Крюгер, Қызылорда мемлекеттік университетінің проректоры, жастар көшбасшысы Жандос Базартай баяндама жасап, ұсыныстарын білдірді.
Облыс әкімі Жолдаудың бағыт-бағдары тағы да талқыланатынын тілге тиек етті. Әсіресе қарапайым халықтың өз пікірлерін білдіріп, ортақ шешімде болулары керектігіне назар аударды. Мемлекет басшысының бұл Жолдауы еліміздің тәуелсіздігінің жаңа дәуіріне батыл да нақты қадам жасағанының айқын көрінісі екеніне де тоқталды.
(Актив отырысында талқыланған тақырыптар туралы кеңірек газетіміздің алдағы санынан оқи аласыздар)
>>> Біздің Facebook, Instagram парақшаларымыз бен Telegram каналымызға жазылыңыз! <<<
