Республика күні қарсаңында Астана қаласында дәстүрлі «Мерейлі отбасы-2025» ұлттық байқауының жеңімпаздарын марапаттау рәсімі өтті. Елдің түкпір-түкпіріндегі өнегелі әулеттерді біріктіретін, татулық пен бірлікті дәріптейтін шараға облыстық кезеңнің үздіктері қатысты.
Салтанатты жиында Парламент Сенатының төрағасы Мәулен Әшімбаев отбасы институтын нығайту бағытында мемлекет тарапынан жүзеге асырылып жатқан бастамаларға тоқталды.
Биылғы «Мерейлі отбасы» ұлттық байқауында Қызылорда облысының намысын қорғаған Әбсадықовтар отбасы жеңімпаз атанып, мерейі үстем болды. Еңбегімен елге үлгі болып, ұрпақ тәрбиесінде өнеге көрсеткен әулет көпке сыйлы. Бірлігі мен татулығы бекем, ынтымағы жарасқан әулеттің отағасы Жақсылық Әбсадықов ұзақ жылдар ауыл шаруашылығы саласында абыройлы еңбек етіп, зейнетке шыққан.
Саланың дамуына елеулі үлес қосқан ардагер «Социалистік жарыстың жеңімпазы» белгісінің иегері және Сырдария ауданының әлеуметтік-экономикасының дамуына елеулі үлес қосқаны үшін ауданның 90 жылдық мерекелік медалімен марапатталған.
Тамыры тереңге жайылған Әбсадықовтар отбасында 6 баладан 29 немере мен 47 шөбере өніп-өсуде. Отбасы мүшелері түрлі салада еңбек етіп, ел дамуына үлес қосып келеді. Ұрпақтар сабақтастығын, еңбектің қадірін, рухани құндылықты үлгі тұтады. Шаңырақ шаттығын, бақытын, берекесі мен бірлігін ерекше бағалайды. Мұндай өнегелі әулет жастарға үлгі, қоғамның тірегі екені сөзсіз.
Байқау жеңімпаздарына дипломдар мен арнайы сыйлықтар, сертификат табысталды. «Мерейлі отбасы» жобасы жыл сайын ел ішіндегі татулық пен рухани бірлікті нығайтуға бағытталған маңызды бастама ретінде жалғасып келеді.
«СБ» ақпарат
