Биыл Халықты әлеуметтік қорғау саласындағы реттеу және бақылау комитетінің облыс бойынша департаменті тұрғындарды зейнетақымен қамсыздандыру, әлеуметтік төлемдер тағайындау, медициналық-әлеуметтік сараптама жүргізу, мүгедектігі бар азаматтарды қолдау және арнаулы әлеуметтік қызметтер туралы заңнаманың орындалуын бақылау бағытында бірқатар жүйелі жұмыстар атқарды.
Департамент басшысы Бекболат Шәріпбековтің айтуынша, жыл басынан бері өңірде 30251 жаңа зейнетақы мен жәрдемақы рәсімделген. Сонымен қатар, «Мүгедектігі бар адамдардың орталықтандырылған деректер банкі» ақпараттық жүйесінде 34768 мүгедектігі бар азамат тіркелген. Соңғы алты айда медициналық-әлеуметтік сараптама бөлімдері арқылы 6536 қызмет алушыға мемлекеттік қызмет көрсетіліп, оның ішінде 1321 азаматқа алғаш рет мүгедектік тобы тағайындалған. Одан бөлек 10 мың адамға шаққандағы алғашқы мүгедектіктің қарқынды көрсеткіші 15,6 пайызды құрады.
Ал балалар арасында бұл көрсеткіштің төмендеуі байқалады. Мәселен, І жартыжылдықта 455 балаға мүгедектік берілсе, өткен жылы бұл сан 509 болған. Яғни 11,8 пайызға азайған.
Облыс аумағында 1 қаңтардан бастап 269,5 мыңнан астам зейнетақы мен жәрдемақы алушылардың төлемдері қайта есептелді. Сонымен қатар республикалық бюджет есебінен тағайындалатын әлеуметтік төлемдерге қатысты 16 мемлекеттік қызмет түрі бойынша 55639 азаматқа қызмет көрсетілді. Департамент мамандары 25388 іс-макетті қайта қарап, бұл көрсеткіш өткен жылдың сәйкес кезеңімен салыстырғанда 0,7 пайызға жоғарылаған. Оның ішінде 1616 іс бойынша төлем тағайындаудан бас тартылған. Тағайындаудан бас тартудың басты себебі, 1493-нің зейнетақы жинақтарының сомасы міндетті жарналардан артық болса, 123-нің құжаттарының толық болмауы негіз болған. Кері қайтарылған істердің басым бөлігі зейнетақы төлемдері мен көпбалалы отбасыларға арналған жәрдемақыларға қатысты.
– Әлеуметтік салада халықтың құқықтарын қорғау, сапалы қызмет көрсету және заңнаманың орындалуын қамтамасыз ету – біздің басты міндетіміз. Бұл бағыттағы жұмыстар алдағы уақытта да жүйелі түрде жалғасын табады, – деді департамент басшысы Бекболат Шәріпбеков.
Мейрамгүл ДАУЫЛБАЙҚЫЗЫ,
«Сыр бойы»
