Әлеуметтік сала реформаларының басты мақсаты – халықтың тұрмыс жағдайын, өмір сүру сапасын арттыру. Бұл саланың жұмыс нәтижесі де халықтың әл-ауқаты мен әлеуметтік жағдайының тұрақталуымен өлшенеді. Бүгінде жұмыстар мен жобалар жетерлік.
Басқарма бірнеше бағытта жұмыс атқарады, екі мемлекеттік қызмет көрсетеді. Бес арнаулы әлеуметтік қызмет көрсету орталығы бар. Атқарылған жұмыстардың нәтижесінде халықты тұрақты жұмысқа орналастыру бойынша республикада алдыңғы орынға енді. Биылға 46560 жұмыс орнын құру жоспарланса, 11 айда 43318 адам жұмыспен қамтылған. «Бастау Бизнес» жобасы бойынша кәсіпкерлік негіздеріне 3525 адам оқыса, «Электронды еңбек биржасы» порталы арқылы 36966 онлайн оқудан өтіп, біліктілігін арттырды.
Облыстық жұмыспен қамтуды үйлестіру және әлеуметтік бағдарламалар басқармасының басшысы Ғабит Жаңабаевтың айтуынша, жыл басынан 109 рет бос жұмыс орны жәрмеңкесі өткізіліп, 1648 адам тұрақты, 744 адам уақытша жұмысқа орналасты, 4729 адамға кеңес берілген.
– Жұмыс күшінің ұтқырлығын арттыру үшін солтүстікке 80 отбасы қоныс аударды. Мүгедектігі бар адамдарды еңбекке тарту квотасымен 76 адам жұмысқа орналасты. Жұмыссыздық деңгейі 4,8-ден 4,6 пайызға дейін айтарлықтай төмендеп, республикалық көрсеткішпен бір деңгейде қалыптасты.
Оңалту құралын пайдалануды үйренуде
Әлеуметтік қолдауға мұқтаж жандардың бірі – мүгедектігі бар адамдар. Орталықтандырылған деректер қорына қарағанда, 34 мыңнан астам мүгедектігі бар адам тіркелген.
Әлеуметтік қызметтер порталы арқылы 35604 мүгедектігі бар адамның 33368-і оңалтудың жеке бағдарламасына сәйкес техникалық оңалту құралдарымен қамтамасыз етіліп, 93,8 пайыз болды. Облыс көлемінде 2023-2027 жылдарға 1830 әлеуметтік инфрақұрылым объектісін бейімдеуден өткізу жоспары белгіленді. Биыл мәдениет, денсаулық сақтау, білім беру, транспорт, жеке сектор, әлеуметтік және спорт саласы бойынша жоспарланған 360 нысанның 344-не бейімдеу жұмыстары жүргізілді.
Облыста инватакси қызметін 67 автокөлік көрсетеді, 12 автокөлік кресло-арбамен жүретін мүгедектігі бар адамдар үшін бейімделген. Оған бюджеттен 268,9 млн теңге бөлініп, жыл басынан бері 1742 адам инватакси қызметімен қамтылды.
Облыста ерекше қажеттілігі бар азаматтардың еркін қозғалысына, қоғам өміріне белсенді араласуына және әлеуметтік бейімделуіне жағдай жасау үшін «INTERTASCO» ЖШС Қызылорда облыстық мүгедектер қоғамына инватакси автокөлігін сыйға тартты.
Арнаулы әлеуметтік қызметтер көрсету балалар орталығы базасында 2024 жылдан іске қосылған «Үй жағдайында мүгедектігі бар балаларды оңалту» жобасы бар. «Қазақстан халқына» қоғамдық қоры 95 оңалту құралын алды. Бүгінде реабилитолог мамандар 142 балаға оңалту құралын пайдалануды үйретуде.
Биыл екінші жыл барлық санаттағы мүгедектігі бар адамдарға 3 айлық есептік көрсеткіш мөлшерінде бір реттік әлеуметтік көмек беруге облыстық бюджеттен қаржы бөлініп, 25 қазан Ұлттық мереке – Республика күніне орай төленді.
Атаулы көмекті алатындар азайды
Бұрын атаулы әлеуметтік көмекті алу үшін түрлі амалға баратындар көп еді. Қазір көмек тек шын мұқтаждарға берілу керек деген Мемлекет басшысының тапсырмасы бар. Облыста мұндай көмекті 3708 отбасы алады.
Еңбекке жарамды жастағы 413 адам жұмыспен қамтылды. Аз қамтылған 814 отбасына тұрғын үй көмегі төленді.
Жекелеген санаттағы әлеуметтік қолдауды қажет ететін 9061 адамға әлеуметтік төлем берілген. Бюджеттен тыс көздерден көмекке мұқтаж халықтың әлжуаз топтарынан шыққан отбасыларға қайырымдылық көмек көрсетіліп келеді.
Биыл стационарлық және жартылай стационарлық жағдайда 2746 адамға арнаулы әлеуметтік қызмет көрсетілді. Облыстық бюджеттен бөлінетін қаржы көлемі артып, орталықтардың материалдық-техникалық базалары жыл сайын жаңартылуда.
Облыста мемлекеттік тапсырыс шеңберінде «Самұрық» инновациялық идеяларды дамыту орталығы» қоғамдық қоры тұрмыстық зорлық-зомбылыққа ұшыраған 260 адамға, «Шағын кәсіпкер әйелдерінің қоғамы» қоғамдық бірлестігі адам саудасының құрбанына ұшыраған 32 жанға арнаулы әлеуметтік қызмет көрсетеді.
Айсәуле ҚАРАПАЕВА,
«Сыр бойы»
