Атақты диқан, екі мәрте Социалистік Еңбек Ері Ыбырай Жақаев атындағы ауылда атакәсіпті өркендетіп келе жатқан ірі құрылымның бірі «Алтын дән-Шиелі» шаруа қожалығы егіншілері егіс алқабына шықты. Аталған елді мекенде 7 бірдей шаруа қожалығының басын қосып, ірілендірген шаруашылық биыл күріш көлемін 1000 гектарға жеткізуді көздесе, 250 гектар ескі жоңышқалықты да ерте күтімге алып, агротехникалық шараларын жүзеге асырып үлгерді. Ұжымда әзірге 50 ауыл тұрғыны еңбек етіп келеді.
«Алтын дән-Шиелі» шаруа шылығы өткен жылы күріштің әр гектарынан орташа 68 центнерден өнім алды. Биылғы межесі де жоғары. Ерте көктемде 20 километр су жолдарын тазалап үлгерген ұжым, егіске қажетті техникаларды да дер кезінде күрделі және жай жөндеуден өткізіп, әзірлігін сақадай-сай етті. Міне, енді шаруашылық төрағасы Асқар Бердібаев бастаған ұжым дала қосы басынан табылып, жерге дән тастау жұмысын қызу жүргізе бастады.
– «Көктемнің бір күні жылға азық» деген қанатты сөзді қайталаудан жаңылыспаймыз, бұл сөз бізді ортақ іске жұмылдырып, сеніміміздің нығаюына септігін тигізеді. Егін егу науқанына 4 шынжыр табанды және 4 доңғалақты тракторды жұмылдырып отырмыз. Жанар-жағармай толық. Қажетті минералды тыңайтқыштарымыз дайын. Яғни, іркіліссіз өз жоспарымызды уақытында орындап шығуға мүмкіндік бар, – дейді шаруашылық басшысы бізбен әңгімесінде.
Расында ширақ қимыл шаруаның өнімділігін көтереді. Осындағы механизаторлар Құрбан, Оңғар, Нұрболаттардың әбжіл әрекеттері көрген көзді сүйсінтеді. Олармен бірге звено жетекшісі Серікбол Сейтмұханұлы, сушылар Айдар мен Асхат және басқа жұмысшылар да қарбалас тірлік үстінде. Асқар Бердібаевтың сөз басында айтқан көктемнің әр минутының қадірін жете ұғынып, талапқа сай еңбек етулері ертеңгі күннің нық тірегі екендігін аңғартады. Ұжым төрағасының айтуынша, аймақ басшысының шаруашылықтарды ірілендіру саясатына сай тағы да ауылдағы 3 шаруашылықты біріктіру жұмыстары жүргізіліп жатқандығын білдік. Яғни, іріленген шаруашылық арқылы ауқымды жұмыстарды ұйымдастыруға жол ашылатыны соғұрлым мемлекеттік қолдауға да ие болатындығын қарапайым ауыл адамдары жете сезіне бастады деген сөз.
Нұрмахан ЕЛТАЙ.
Шиелі ауданы,
Жақаев ауылы.
>>> Біздің Facebook, Instagram парақшаларымыз бен Telegram каналымызға жазылыңыз! <<<
