Аудан әкімі Айтбай Жандарбеков аудан әкімдігінің мәжіліс залында халықаралық жарыстарда жүлделі орындарды иеленген аудан спортшыларын қабылдады.
Аудан басшысы қабылдауда ауданымыздың мерейін асқақтатқан жас спортшыларды жарқын жеңістерімен құттықтап, арнайы құрмет көрсетті.
Қабылдауда аудан әкімі: «Байрақты бәсекелерде көк туымызды көкке көтеріп, Әнұранымыздың асқақ шырқалуы мына отырған сіздердің талмай жаттығып, мақсатқа жету жолындағы маңдай терлеріңізбен келеді. Мен аудан әкімі ретінде де, әкімдік тарапынан да әрдайым қолдау білдіреміз. Біз сіздердің жеңісті жолдарыңызға жол ашамыз және сіздердің жеңіс жолдарын жаңғыртып, аудан абыройын асқақтата беретіндеріңізге сенемін. Еліміздің мерейін асырып, абыройын тасытатын өздеріңізге мұқалмас жігер мен қажымас рух тілеймін» – деді.
Айта кетсек, 10-13 қараша күндері Ресей мемлекеті Қазан қаласында өткен жасөспірімдер арасында белбеу күресінен әлем біріншілігінде жерлесіміз Сәдібеков Наурызбай 71 кг салмақта күміс жүлдегер атанса, 50 кг салмақта Төлепов Бағдаулет әлем біріншілігінің қола жүлдегері атанды. Сонымен қатар, 8-11 қараша күндері Өзбекстан Республикасының Ташкент қаласында өткен ересектер арасында аралас ІММА жекпе-жектен әлем чемпионатында жерлесіміз 88 кг салмақ дәрежесінде Шәкірбеков Абылай күміс жүлдегері атанды.
Шиелі ауданы әкімінің баспасөз қызметі
>>> Біздің Facebook, Instagram парақшаларымыз бен Telegram каналымызға жазылыңыз! <<<
