«AMANAT» партиясының «Кітап – AMANAT» партиялық жобасы аясында Қазақстан Журналистер одағының мүшесі, аудармашы Бақтияр Мырзашпен кездесу өтті. Іс-шараны партияның Сырдария аудандық филиалы мен аудандық кітапхана кітапханашылары бірлесе ұйымдастырды.
Кездесуді «AMANAT» партиясы Сырдария аудандық филиалының атқарушы хатшысы, депутаттық фракция жетекшісі Ақтөре Ибрагимұлы жүргізді. Алдымен кеш қонақтары аудармашының өмірі мен шығармашылығынан сыр шертетін кітап көрмесімен танысты. Кітапханашы Жанар Оразымбетова көрмеге қойылған автордың кітаптары мен басылымдарда жарияланған мақалалары туралы кеңінен айтып өтті. Әрі қарай іс-шара кітапхананың оқырмандарға арналған үлкен залында аудармашымен кездесумен жалғасты.
– Ең алдымен, Бақтияр Мырзаш ағамызға және бұл кісінің шығармашылығын құрмет тұтатын, аударма саласындағы еңбегін жоғары бағалайтын бүгінгі кештің қатысушыларына шақыруымызды қабыл алып, келгені үшін шынайы ризашылығымызды білдіреміз. Бүгін біз Қазақстан Журналистер одағының мүшесі, аудармашы Бақтияр Мырзаш ағамызды жаңа қырынан танып-біліп, шығармашылығы жөнінде шынайы әңгіме өрбітсек, ашық-жарқын әңгіме-дүкен құрсақ, сырласып, сұхбаттассақ, көңілдегі көркем ойды кестелесек, жалпы ағамызды оқырмандарымен жүздестірсек деп мақсат етіп отырмыз. Ендеше, осы іс-шараның өтуіне ұйытқы болған аудандық кітапхананың кітапханашыларына алғыс айтамын. Біз ақылдаса келе кездесу кешінің атауын «Ауылдан шыққан аудармашы» деп қойдық.
Ауыл – қазақылықтың қаймағы бұзылмаған құт қонып, бақ дарыған мекен. Дара дарын иелерінің бәрі дерлік ауылдан шықты. Ауылдан шығып алты Алашқа танылған азаматтардың санына жете алмасымыз анық. Сол шоқтығы биік азаматтардың сапына біздің бүгінгі кейіпкеріміз Бақтияр Мырзаш ағамызды да қосуға болады, – деді Ақтөре Ибрагимұлы.
Бақтияр Мырзаш 1951 жылы Тереңөзек ауданы С.Сейфуллин ауылында дүниеге келген. 1969 жылы Алматыдағы Байланыс училищесін бітіріп, жаңадан құралған С.Сейфуллин совхозында электрик болып жұмыс істеді. Кейін денсаулығына байланысты жұмыстан босап, ұзақ жыл клуб меңгерушісі болды. Аударма жұмысымен айналысып, жазған дүниелері республикалық, облыстық, аудандық баспа беттерінде жарияланып жүр. Қазір зейнетте. Екі қыз, екі ұл өсіріп, немере сүйіп отыр.
Кездесу барысында қаламгерге бала күнгі арманынан бастап қызығушылықтары, өмір жолы мен еңбек жолындағы қызықты шақтары, ұстаздары, әдеби өмірдегі ізденістері және аударма еңбектері туралы сұрақтар қойылды. Н.Ілиясов ауылының кітапханашысы Сәуле Найзатаева мен Т.Қозыбаев атындағы №131 орта мектебінің мұғалімі Гүлжанар Әбілова аудармашының еңбектерінен үзінді оқыды. Сондай-ақ айтыскер ақын Мұхамеджан Мансұров арнау жыр айтып, көпшіліктің алғысына бөленді.
Кездесу соңында кеш иесі іс-шараны ұйымдастырушыларға алғысын айтып, оқырмандарға ризашылығын білдірді. Сондай-ақ алдағы шығармашылық жоспарын бөлісті.
«СБ» ақпарат
