ҚР Премьер-министрінің кеңесшісі Ералы Тоғжанов облыс әкімінің орынбасары Ардақ Зебешевпен бірге Сырдария ауданының Бесарық ауылына барды.
Бұл ауылда Президент Қасым-Жомарт Кемелұлының бастамасымен қолға алынған, ауыл халқының тұрмыс-тіршілігін, әл-ауқатын жақсартуға бағытталған «Ауыл аманаты» бағдарламасы табысты жүзеге асуда.
«Абай Дәулет» ЖШС құрған өндірістік алаңда ауыл тұрғындарының 13 бизнес бастамасы шоғырланған. Жартылай фабрикат, пластикалық ыдыстар, ағаш бұйымдар, тоқыма, сабын, кондитерлік өнімдер өндіретін цехтар бар. Өсімдік, құс, мал шаруашылығымен, құрылыс өнімдерін шығарумен айналысатын көпсалалы компанияның өндірістік қуаты артуда.
Премьер-министр кеңесшісі серіктестік бастамасы «Сыр құсы» агроөнеркәсіптік кооператив жұмысымен де танысты.
Өндірістік кооператив «Ауыл аманаты» бағдарламасы аясында құрылып, 27,6 млн теңге жеңілдетілген несие алған. Шағын құс фермалары (птичник) салынған. Әрқайсында Тараз қаласынан әкелінген 1500 бас бройлер балапаны (барлығы 4500) бағылады. Бройлердің ерекшелігі еттілігінде, олар 30-55 күнде сойылады және аз уақытта 2-2,5 келі ет береді. «Сыр құсы» кооперативі былтыр 29,7 тонна құс етін өндірді.
Жалпы өңірде құс шаруашылығы бағытында екі кооператив («Сыр құсы» АӨК, «Шиелі құс» АӨК) құрылып, 4500 бас құс бағатын 6 типтік ферма (птичник) жұмыс жасайды. Өткен жылы облыста 85,3 тонна тауық еті өндірілсе, оның 38,3 тоннасы, яғни 46 пайызы осы кооперативтердің үлесінде. Биыл аталған кооперативтер 46 тонна тауық етін өндіріп, ауыл тұрғындарына тиімді бағамен ұсынды.
Айта кетейік, «Абай Дәулет» ЖШС 2018 жылдан бері ауылды дамытуға 1,5 млрд теңгеден астам қаржы бөлді. Қаражат 360 орындық мектеп, 120 орындық балабақша және дәрігерлік амбулатория сияқты әлеуметтік нысандарды абаттандыруға, көгалдандыруға, жөндеуге бағытталды.
Ералы Тоғжанов ауыл халқының табысын арттыру, экономикасын жоғары көрсеткіштерге жеткізу басты міндеттердің бірі екенін айтып, Сыр өңірінде атқарылған жұмыстарға оң бағасын берді. Ал Бесарық ауылында «Ауыл аманаты» бағдарламасы бойынша жүзеге асырылған жобаларды тек облыс көлемінде емес, республиканың барлық өңірлеріне тарату қажеттігін айтты.
