Мемлекет басшысы Қасым-Жомарт Тоқаев Қазақстан халқына арнаған Жолдауында қоғам үшін аса маңызды екі үлкен тақырыпқа ерекше тоқталды. Оның бірі – жасанды интеллект пен цифрлық серпіліс, екіншісі – оқу гранттарының тиімділігі мен түлектердің жұмысқа орналасуы. Бұл мәселелер Қызылорда облысы үшін де айрықша өзекті.
Президент тапсырмасымен елімізде Цифрлық және жасанды интеллект министрлігі құрылатын болды. Сондай-ақ Цифрлық кодекс қабылданады. Бұл шешім – технологиялық дамудың бағытын анықтайтын стратегиялық қадам. Жасанды интеллект қазірдің өзінде медицинадан бастап білім, ауыл шаруашылығы салаларында да қолданыла бастады. Бұл ауылдағы дәрігер тапшылығын азайтуға, мектептерде оқушылардың үлгерімін талдап, мұғалімге тиімді әдіс ұсынуға, шаруалар үшін егін өнімділігін болжауға мүмкіндік береді. Президент атап өткендей, Қазақстан үш жылда цифрландырудың ең жоғары деңгейіне жетуі тиіс. Біздің аймақ та бұл өзгерістен шет қалмауы керек. Интернеттің қолжетімділігін күшейтіп, ауыл мен қала арасындағы алшақтықты жою – басты міндет.
Қызылорда облысында соңғы жылдары электронды мемлекеттік қызмет кеңінен қолданыла бастады. Egov.kz порталы мен мобильді қосымшалар арқылы құжат рәсімдеу, мектепке құжат тапсыру, әлеуметтік төлемдерге өтініш беру – бәрі онлайн қолжетімді. Алайда, облыстың шалғай ауылдарында интернеттің әлсіздігі әлі де өзекті. Кейбір азаматтардың цифрлық сауаттылығы төмен болғандықтан электронды қызметті толық пайдалана алмайды. Сондықтан цифрландыру технология ғана емес, адам капиталына инвестиция екенін түсінуіміз керек.
Жолдауда Президент жастарға қатысты тағы бір маңызды мәселені көтерді. Ол – оқу гранттарының тиімділігі. Жыл сайын мыңдаған жас мемлекет есебінен жоғары оқу орындарына түседі. Бірақ едәуір бөлігі мамандығы бойынша жұмыс істемейді. Қызылордада да жағдай осыған ұқсас. Біз бұл тақырыпты облыстық қоғамдық кеңесте де, облыстық мәслихатта да егжей-тегжей талқылағанбыз, мемлекеттік органдарға ұсыныс та айттық. Өңірде заңгер мен экономист көп, бірақ инженер, дәрігер, ІТ маман тапшы. Жастарға мүмкіндік бар көрінгенімен шын мәнінде бұл – ресурстың тиімсіз жұмсалуы.
Президент бұл олқылықты жою үшін еңбек нарығына қажет мамандықтарға ғана грант бөлуді, техникалық және жұмысшы мамандықтар мәртебесін көтеруді, түлектердің нақты жұмысқа орналасуын қадағалауды тапсырды. Бұл – жастардың білім алуымен қатар өз өңірінде еңбек етіп, қоғамға пайда әкелуін қамтамасыз етуге бағытталған әділ шешім.
Білім мен технологияның үйлесімі ғана елді жаңа деңгейге шығарады. Ал цифрландыру халыққа қызметті қолжетімді, жасанды интеллект өмірді жеңілдету үшін қажет. Білім беру жүйесінің тиімділігі елдің экономикасын арттырып, тұрақтылығын сақтайды.
Аида АБИБУЛЛАЕВА,
«Азаматтарға арналған үкімет» мемлекеттік корпорациясы» коммерциялық емес акционерлік қоғамының Қызылорда облыстық филиалының директоры, облыстық мәслихат депутаты
