Астанада Мемлекет басшысы Қасым-Жомарт Кемелұлы Тоқаевтың қатысуымен өткен ауыл әкімдеріне арналған республикалық диалог-платформаға Талсуат ауылдық округінің әкімі ретінде арнайы қатыстым. Президенттің тікелей бастамасымен ұйымдастырылған бұл алқалы жиын – ауылдық аумақтарды дамыту саясатының жаңа деңгейге көтерілгенінің жарқын көрінісі.
Біріншіден, ауыл әкімдерінің ел Президентімен тікелей жүздесуі – ауыл мәселелерінің ел дамуының стратегиялық бағытына айналғанының нақты дәлелі. Бұған дейін ауыл әкімдері мұндай форматта, мұндай жоғары деңгейде бас қосқан емес. Бұл — ауыл әкімдерінің рөлі артқанын, олардың қабылдайтын шешімдерінің мемлекет үшін маңызы өскенін білдіреді.
Екіншіден, Президенттің ауыл әкімдеріне нақты міндеттер жүктеуі — біздің қызметіміздің бұрынғыдан да жоғары жауапкершілікпен, нақты талаптармен, өлшенетін көрсеткіштермен бағаланатынын көрсетеді. Бұл — сенім мен міндеттің қатар жүктелген сәті.
Үшіншіден, бұл диалог-платформа барлық ауылдардың әлеуметтік-экономикалық дамуын жаңа арнаға бағыттап, ел бойынша ауылдардың әлеуетін арттыру жолында ортақ стратегия қалыптастыруға мүмкіндік берді. Инфрақұрылымды жаңғырту, ауыл тұрғындарының өмір сапасын көтеру, жаңа жобаларды жүзеге асыру — енді жоспар ғана емес, орындалуы қажет нақты міндеттер.
Осылайша, Президенттің ауыл әкімдерін бұрын-соңды болмаған форматта жинауы – алдағы уақытта ауылды дамыту жұмысы жаңа талаптармен, жаңа тәртіппен, жаңа жауапкершілікпен жүзеге асатынын білдіреді. Бұл — әр әкімнің кәсібилігі мен нәтижесі айқын көрінетін кезеңнің басталғанын көрсететін маңызды белгі.
Талсуат ауылдық округінің әкімі ретінде, маған артылған сенімді ақтап, ауылымыздың инфрақұрылымын, әлеуметтік жағдайын және жалпы даму әлеуетін көтеруге бағытталған жұмыстарды жүйелі әрі табанды түрде жалғастыру — басты міндетім болып қала береді.
Ерлан Бейсенбаев,
Талсуат ауылдық округінің әкімі.
