Қазалы ауданындағы Бөзкөл ауылында «Туған өлкем, қандай көркем» атты «Ауыл күніне» арналған салтанатты шара өтті. Мереке орталық саябақта ауыл өнерпаздарының театрландырылған көрінісімен басталды. Халық арасында «Бала ахун» атанып кеткен Тілеумұрат Қошанұлының ұлағатты өмір жолын сахналық көрініспен сомдаған өнерпаздар көпшіліктің ыстық ықыласына бөленді.
Тұрғындардың қуанышын бөліскен Қазалы ауданы әкімі Мұрат Ергешбаев өзінің құттықтауында бірлігі бекем, тірлігі тиянақты елдің алар асуы биік боларына тоқталды.
«Ауыл күні» аясында осы ауылдан шыққан азаматтар, тұрғындардың демеушілігімен салынған «Бала ахун» атындағы жаңа мешіт ел игілігіне берілді. Мешіттің ашылу рәсімінде аудандық ардагерлер кеңесінің төрағасы Оразғали Бекбанов, «Жанқожа батыр» атындағы орталық мешіттің бас имамы Берік қажы Сүлейменов ақ тілегін білдірді. Бөзкөлдіктер атынан Күнәжат Қаниев рухани орталықтың салынуына үлес қосқан барша азаматтарға алғыс айтты.
Бағдарлама барысында ауыл тұрғындары әртүрлі спорттық жарыстарды тамашалады. Жастар сынға түскен қазақ күресі, арқан тарту, волейболдан өткен жарыста мықтылар анықталса, бәйге ауыл мерекесінің көрігін қыздыра түсті. Шара орталық саябақта аудан өнерпаздарының концерттік бағдарламасына ұласып, от шашумен аяқталды.
Қазалы ауданы.
>>> Біздің Facebook, Instagram парақшаларымыз бен Telegram каналымызға жазылыңыз! <<<
