Өңірде көктемгі егін науқанына дайындық жұмыстары қарқынды жүргізілуде. Биыл облыс бойынша 185,8 мың гектар жерге ауыл шаруашылығы дақылдарын егу жоспарланған. Өткен жылмен салыстырғанда негізгі дақыл – күріштің көлемі 10,9 мың гектарға қысқартылып, жалпы 70 мың гектарға орналастырылады. Қысқарған күріш алқаптарының орнына жүгері егу жоспарланып отыр.
11 наурыздағы дерекке сүйенсек, «Шардара» су қоймасына жоғарыдан секундына 1176 текше метр су түсуде. Қоймадағы су көлемі 5 млрд текше метрді құрайды. Төменгі ағысына 600 текше метрі жіберілуде. Ал «Көксарай» су реттегішінде жинақталған су көлемі – 1,5 млрд текше метр. Ол былтырғы жылдан 354 млн текше метрге артық.
– Жылдағыдай күріш егу науқаны сәуір айының ортасында басталады. Облыс бойынша егілетін күріштің 2,7 пайызы ғана отандық сорттар. Ауыл шаруашылығы дақылдары тұқымының сапасын себу дәрежесіне жеткізу жұмыстары егін науқаны басталғанға дейін толықтай аяқталады. Вегетациялық кезеңде егінді сумен қамтамасыз ету үшін су жүйелерін тазарту, құрылғыларды реттеу жұмыстары қарқынды жүргізілуде, – деді облыстық ауыл шаруашылығы және жер қатынастары басқармасының басшысы Талғат Дүйсебаев.
Көктемгі дала жұмыстарына қажетті жанар-жағармай қоры алдын ала қарастырылған. Атап айтқанда, шаруаларға 10,1 мың тонна арзандатылған дизель отыны бөлінген. Ал өңірдегі негізгі дақыл – күрішті егу жұмыстары сәуір айының үшінші онкүндігіне жоспарлануда. Биыл егін көлемінің 89,7 мың гектарын дәндi дақылдар, 6,1 мың гектарын майлы дақылдар, 73,2 мың гектарын малазықтық, ал 16,8 мың гектарын картоп, көкөнiс, бақша дақылдары құрайды. Қолда бар 3975 ауыл шаруашылығы техникалары толығымен жөндеуден өткізілген.
Жалпы, өңірде көктемгі дала жұмыстары жоспарға сәйкес жүргізіліп, шаруалар жаңа маусымға тың дайындықпен кірісуде.
Облыста су ресурстарын тиімді пайдалану, су шығынын азайту мақсатында мемлекеттік қолдау шараларына алдағы үш жылға 34 млрд теңгеден астам қаржы қарастырылған. Оның ішінде 2026 жылға 10 млрд теңге бөлініп отыр. Сол арқылы су үнемдеу технологияларымен егіндік көлемін 16 мың 700 гектарға ұлғайту жоспарланған.
– Бұл үшін Жалағаш, Шиелі, Жаңақорған, Қармақшы аудандарында 6 инвестициялық жобаны іске асыру қолға алынды. Алдағы вегетациялық кезеңге дайындық мәселелері бойынша салалық республикалық және облыстық мекеме басшылары, су шаруашылығы мекемелері және қаржылық институттар басшыларымен арнайы жұмысшы топ құрылды. Олар суды көп қажет ететін дақылдар көлемін оңтайландыру, су үнемдеу технологиясын енгізу, оларға берілетін мемлекеттік қолдау, заңсыз артық егін екпеу жөнінде барлық ауданда желтоқсан айынан бастап шаруашылық құрылымдарына түсіндірме жұмыстарын тұрақты түрде жүргізуде. Сонымен қатар, 2025 жылы диқандар күріштің 60 мың гектарын лазерлік тегістеуден өткізсе, биыл бұл көрсеткішті 65 мың гектарға жеткізу жоспарланған, – деді басқарма басшысы.
Әділжан ҮМБЕТ,
«Сыр бойы»
