Біз М.Мәметова атындағы Қызылорда педагогикалық жоғары колледж ұжымы болып Қазақстан Республикасының Президенті Қасым-Жомарт Тоқаевтың «Жасанды интеллект дәуіріндегі Қазақстан: өзекті мәселелер және оны түбегейлі цифрлық өзгерістер арқылы шешу» тақырыбындағы Қазақстан халқына Жолдауын зор ықыласпен тыңдадық.
Президент ел дамуының негізгі бағыты ретінде цифрландыру мен жасанды интеллектіні енгізуді атап өтті.
Биылғы Жолдаудың біріктіруші идеясы – цифрландыруды кең көлемде дамыту және жасанды интеллектіні жаппай енгізу. Осы орайда Президент экономиканың түрлі салаларына цифрландыру мен жасанды интеллект құралдарын жеделдетіп енгізу міндетін жүктеді.
Сондай-ақ жас ұрпақтың патриотизмді қабылдау ерекшелігіне де тоқталды. Президенттің айтуынша, жастар елді сүюді жаңа іс бастау, халыққа пайдасы тиетін жаңалық ашумен байланыстырады. Олар Қазақстанды өркениетті, дамыған мемлекет ретінде көргісі келіп, заманауи технологияларды меңгеруге ұмтылуда.
«Жастардың бойындағы патриотизм – болашаққа деген шынайы ұмтылыс. Бұл – қоғам санасындағы өзгерістің айқын көрінісі. Мен олардың күш-жігеріне, дарыны мен біліміне сенемін» деді Қасым-Жомарт Тоқаев.
Ол жастарға ғылым-білім жолында жан-жақты қолдау көрсетілетінін атап өтті. Әлемде жүріп жатқан түбегейлі өзгерістерге жас буынның тез бейімделетінін, әсіресе жасанды интеллект дәуірінде олардың рөлі ерекше болатынын айтты.
Президент сонымен қатар білім беру саласы мен жасанды интеллектіні дамытудың маңыздылығын ерекше атап өтті. Мәселен, жасанды интеллектімен жұмыс істеу құзыретін қалыптастыру әлдеқайда ерте жастан, яғни мектеп қабырғасынан қолға алынуға тиіс екенін, осыған орай бірқатар бастаманы жүзеге асыру, ең алдымен, мектеп оқушыларына арналған жасанды интеллект негіздері туралы бағдарлама және оқу материалдарын әзірлеу қажет екені, ұстаздардың жасанды интеллект технологиясын меңгеру дағдысын да қалыптастыру керек болатыны айтылды.
Білім саласындағы бастамалар – еліміздің одан әрі әлеуметтік-экономикалық дамуына негіз болатын сапалы адами капиталды қалыптастырудың мықты қозғаушы күші.
Колледж ұжымы Мемлекет басшысының бастамаларын толығымен қолдай отырып, білім беру саласы, цифрландыру мен жасанды интеллектіні дамыту, жасанды интеллект дәуіріндегі жас ұрпақтың патриоттық тәрбиені бойына сіңірген педагогикалық кадрларды даярлау ісіне өзіндік үлесін қоса бермек.
Жақсыгүл ТОҒАНОВА,
Мәншүк Мәметова атындағы Қызылорда педагогикалық жоғары колледжінің директоры
