Халқымызда «Ердің атын ел шығарар, елдің атын ер шығарар» деген даналық сөз бар. Бірінен-бірі ажырағысыз егіз ұғымға сай келетін азамат, «Құрмет», «Парасат» ордендері мен «Ерен еңбегі үшін» медалінің иегері, Қазақстанның Құрметті құрылысшысы, Балық шаруашылығы саласының еңбек сіңірген қызметкері, Қызылорда қаласының, Арал, Қазалы, Жаңақорған аудандарының құрметті азаматы, республикалық «Жалаңтөс баһадүр» қорының президенті Нажмадин Түрікбенұлы Мұсабаев дер едік.
Бүгінде ол жеті қырдан асып, 75 жасқа толып отыр. Мерейлі жасына құр қол келіп отырған жоқ, балалары Еркінбек Түрікбенұлы Мұсабаев пен Нұрназар Нажмадинұлы Түрікбеннің авторлығымен жарыққа шыққан «Тектілік туын түсірмеген тұлға» атты кітабын тарту етуде. Бір айта кетерлігі, бұған дейін де балалары Айгүл, Әділбек Мұсабаевтар «Ұлыларды ұлықтаған тұлға» (2010 ж), «Тумысы бөлек тұлға» (2011 ж) атты кітаптарын шығарған еді. Ал бүгінгі кітап сол туындылардың заңды жалғасы деуге болады. Әке алдындағы перзенттік парыздың өтеуіндей көрінген туындылар Нажмадин Мұсабаевтың еңбек және өмір жолын, қызметтес замандастары мен өзі басқарған аудандардың жарқын бейнесін баяндауға арналған.
Жуырда өзі әкім болып қызмет атқарған Жаңақорған, Қазалы, Арал аудандарында мағлұматы мол жаңа туынды – «Тектілік туын түсірмеген тұлға» кітабының тұсаукесер рәсімі болып, Н.Мұсабаевтың 75 жасқа толуы салтанатты жағдайда атап өтілді. Оған аудандардағы зиялы қауым, қоғамдық ұйым, бұқаралық ақпарат құралдары мен шығармашылық топ өкілдері, ел ағалары қатысты. Жаңақорғанда аудан әкімі Мажит Самитов, кенттің ардагерлер кеңесінің төрағасы Серқожа Ыдырысов, ауыл шаруашылығы саласының ардагері Алмас Нәлібаев, Қазалыда аудан әкімі Алмасбек Есмаханов, аудандық ардагерлер кеңесінің төрағасы Оразғали Бекбанов, ауданның құрметті азаматы Қасқырбай Әлімбай, Аралда аудан әкімі Аманжол Оңғарбаев, аудандық ардагерлер кеңесінің төрағасы Әділбек Әйімбетов, мемлекеттік қызмет саласының ардагері Әнес Әуезов құттықтау сөз сөйлеп, мерейтой иесінің иығына шапан жабылып, құрмет көрсетілді. Салтанатты шараларда сөз алған кітап авторының бірі Нұрназар Түрікбен жаңа туындының мазмұнына шолу жасап, кеңінен таныстырса, қоғам қайраткері Н.Мұсабаев өзіне көрсетілген құрмет үшін шынайы алғысын білдірді.
Осылайша еліне ерекше еңбек сіңірген азаматы, айрықша ардақталды. Өйткені ол – ұлыларды ұлықтаған, тумысы бөлек, тектілік туын түсірмеген тұлға.
Жұмабай ЖАҚЫП.
Арал ауданы
