Экспортталатын көліктің утильалымы өсті
Утилизациялық алым ставкаларындағы өзгерістер тек Қазақстанға Беларусь Республикасы мен Ресей Федерациясынан әкелінетін автокөліктер мен өздігінен жүретін ауыл шаруашылығы техникасына ғана қатысты болатыны Өнеркәсіп және құрылыс министрлігінде айтылды.
– Бұл Қазақстаннан Ресей мен Беларуське экспортталатын автокөліктерге утилизациялық алымды есептеу кезінде аталған елдерде белгіленген мөлшерлемеге қосымша түрде Қазақстанда төленген кедендік баждар, қосылған құн салығы мен акциздер арасындағы айырманың алынуымен байланысты. Алайда Еуразиялық экономикалық одақтың Кеден кодексінің 454 және 456-баптарына сәйкес, Қазақстанда өндірілген автокөліктер – ЕАЭО тауарлары. Осыған орай, Беларусь пен Ресейде қазақстандық өндірістегі автокөліктерге кедендік коэффициенттерді қолдану заңсыз, – делінген хабарламада.
Ал елімізде өндірілетін техникаға, сондай-ақ ЕАЭО-ға мүше емес мемлекеттерден, Армения мен Қырғызстаннан импортталатын техникаға утилизациялық алым ставкалары бұрынғы деңгейде сақталады. Сонымен қатар Қазақстан мен ЕАЭО серіктестері арасындағы утилизациялық алым ставкаларындағы теңгерімсіздікті жою үшін ресейлік және беларусьтік техникаға арналған утильалым мөлшері Ресей Федерациясының заңнамасында 2025 жылғы 1 желтоқсаннан бастап белгіленген төлем деңгейіне теңестіріледі.
ЖИ-сервистер кеңейтіледі
Қазақстанда әлеуметтік мәні бар ауруларды ерте диагностикалауға және медицина қызметкерлерін қолдауға бағытталған денсаулық сақтаудағы басым ЖИ-жобалардың тізбесі қалыптастырылды деп хабарлайды ДСМ баспасөз қызметі.
Негізгі бағыттардың қатарына инсульт, өкпе және сүт безі обырын ерте диагностикалау, сондай-ақ жасанды интеллектті қолдана отырып, стоматологиялық суреттерді талдау жатады. Бұл шешімдер қазірдің өзінде практикалық денсаулық сақтау саласында енгізіліп, кеңейтіліп жатыр.
Бүгінде отандық медицина мамандары түрлі ЖИ-сервистерді белсенді қолданады. Осылайша Cerebra 5 өңірдегі II және III санаттағы 9 инсульт орталығында, WDsoft шешімі 10 өңірдегі 190 медициналық ұйымда, AIDENTIS платформасы 65 стоматологиялық клиникада және 3 медициналық ЖОО-да енгізілді. ALIMA медицина қызметкерінің ЖИ-ассистенті бүкіл ел бойынша 700-ден астам емханада қолданылады.
Мұнай өндіру қайта жанданды
«Теңізшевройл» компаниясы электр энергиясын тарату жүйесі қауіпсіз түрде іске қосылғанын және шикі мұнайдың бастапқы өндіру жұмыстары қайта басталғанын мәлімдеді.
Компанияның таратқан ресми ақпаратына сүйенсек, қазіргі уақытта өндіріс көлемі мүмкіндігіне қарай кезең-кезеңімен арттырылып жатыр.
– ТШО қауіпсіз әрі сенімді өндірісті қамтамасыз ету қағидаттарына адал болып қала береді. Бұдан өзге ТШО өз өндірістік қызметінің егжей-тегжейлеріне түсініктеме бермейді,– деп мәлімдеді компанияның баспасөз қызметі.
Еске салайық, 18 қаңтарда «Теңіз» кен орнында өрт болып, 450-ден аса жұмысшы эвакуацияланған еді.
Ақпарат көздрінен
