Астанадағы «Қазақконцерт» залында танымал әнші-композитор, ақын, Сыр елінің төл перзенті, қазақтың дарынды қызы Елена Әбдіхалықованың «Сағыныш ғұмыр» шығармашылық кеші болып өтті.
Елена мектеп қабырғасында жүріп-ақ айтысқа қатысып, ән жазған талант.
Ол 1991-2002 жылдар аралығында облыстық, республикалық, халықаралық жүзге жуық ақындар айтысының жеңімпазы атанған.
Сонымен бірге ол – Фариза Оңғарсынова, Иран-Ғайып, Светқали Нұржан сынды қазақтың қабырғалы ақындары жоғары баға берген жазба ақыны. Оның қаламынан туған «Қарашық», «Бақыт құсы», «Шынар көлі» аталатын жыр жинақтары да көпшіліктің қолынан түспеген туындыларға айналды.
Елорда төріндегі Еленаның мерейлі кешіне облыс әкімі Нұрлыбек Нәлібаевтың арнайы құттықтауын, сый-сияпатын, ықылас гүлін жеткізуге облыс әкімінің орынбасары Шахмардан Байманов қатысты. Кеште қазақ эстрадасының жұлдыздары Қазақстанның еңбек сіңірген қайраткерлері Светлана Айтбаева, Жұбаныш Жексенұлы, талантты әншілер Дәурен Сейітжанов, Шолпан Шарапатова, Аида Байгелова, Арайлым Ыбыраева, Мұратбек Хайролда, Өзгеріс Шерікбай, музыкалық жас көрермен театры және «Saz & Soul» тобы, басқа да өнерпаздар өз тартуларын ұсынды.
Бұл кештің ерекшелігі әндердің бәрі жанды дауыста шырқалды. Жасандылықтан шаршаған талғампаз жұртшылық Еленаның мөлдір бұлақтай сыңғырлаған әуендерінің саф әсеріне бөленді.
Елена әндері өрнекті және өміршең. Мәселен, оның «Есіңе мені алғайсың» әнінің жазылғанына отыз бес жыл болыпты, алайда, бұл ән кеше ғана өмірге келгендей, әр күні шырқалып келе жатыр.
Сондай-ақ кеште орындалған ақын Е.Жүністің сөзіне жазылған «Сағыныш-ғұмыр» әнші репертуарындағы – таңдаулы әндердің бірі.
Еленаның өз сөзімен айтсақ, кештің негізгі мақсаты – сағыныш сезіміне сәуле құйып, замандастарымыздың бір-біріне деген сыйластық құрметін арттыру. Расында, қазір сағыныш азайған, алыстан жылдам хабар алғызған смартфондар қадірліңнің жүзін сәт сайын көз алдыңа тосады. Бүгінде есіктен тосын кіріп келетін ешкім жоқ. Бір сәттен кейін кіммен кездесетініңді көріп отырасың, сонда қалай сағынбақсың?
Қазақтың талантты қызы адам кеудесіндегі асыл сезімді әнмен тербеп қайтарып, оны аялап ұстауға үндейді.
«Сағыныш-ғұмыр» – дара таланттың осы мақсатын орындау жолындағы бір белесі, мұны көрген де, естіген де сөзсіз сезінді.
Айта кетейік, биыл облыс әкімінің қолдауымен Елена Мәжитқызының «Жасай бер, Қызылорда!» атты республикалық әншілер конкурсы өзінің туған жерінде өткізілмек.
Дүйсенбек АЯШҰЛЫ,
«Сыр бойы»
