Наурыз мейрамында халқымыздың мәдениеті мен ұлттық салт-дәстүрі ұлықталады. Бұл күн мәдениетімізді, өнеріміз бен ұлттық құндылықтарымызды насихаттауға арналады.
Қазақ халқының басты құндылықтарының бірі – салт-дәстүрі. Ата-бабаларымыз дінді де дәстүрмен сабақтастыра қабылдаған. Сол секілді мәдениет пен дәстүр біріккенде ғана халықтық мақсатын орындайды.
Ғасырлар ауысады, дәуір өз бет-бейнесін қалыптастырады. «Елу жылда – ел жаңа, жүз жылда – қазан» деген сөз соған байланысты өмір тәжірибесінен алынған даналық. Ал салт-дәстүр сақталып қала береді, ол бұзылса, халық өзінің болмысынан ажырайды.
Міне, «Мәдениет және ұлттық салт-дәстүр күні» не үшін қажет, оның атқарар міндеті мол. Салтымызды сақтап, дәстүрімізді дәріптеуді мемлекетіміз басты міндеттерінің бірі санап, ұрпақ құндылығына айналдыруды көздейді.
«Қай ұлттың болсын ана тілі, ата дәстүрі, салт-санасы – сол халықтың өзіндік қадір-қасиетін, жан дүниесін, тұрмыс-тіршілігін көрсететін төл белгілері. Олар – бүкіл бір халықтың өмір жолында ғасырлар бойы мысқалдап жинаған рухани қазынасы, ұрпақтан-ұрпаққа қалдырған ардақ-мұрасы. Онсыз қара шаңырағы бар іргелі ел болып, бүтін ұлт болып қалу мүмкін емес. Ана тілі, ата дәстүр өзінен-өзі жалғаспайды немесе біреу сырттан келіп сен үшін көсегеңді көгертіп сақтап та бермейді. Халықтың өз бет-бейнесінен айырылуы не сақтап қалуы әрбір ұрпақ өкілінің өзінен кейінгі ізбасарларына бабалар аманатын қай сапада жеткізуіне байланысты», – дейді батыр Бауыржан Момышұлының келіні, этнограф-жазушы Зейнеп Ахметова.
Расында, біздің мәдениетімізді, салт-дәстүр, ғұрпымызды ешкім де насихаттай алмайды, өйткені, бұл құндылықтарды басқалар оқып-білгенмен, қазақ секілді бойына сіңіре алмайды. Зейнеп апаның айтып отырғаны – осы.
Құда түсу, сүйінші сұрау, неке қию, беташар, келіннің сәлем салуы, бесікке салу, тұсаукесер, ат тергеу, жиендік жасау, енші беру сияқты салт-дәстүрлеріміз қандай керемет! Басқа халықта бар ма екен, жоқ па екен…
Облыстық мәдениет, архивтер және құжаттама басқармасының бөлім басшысы Қарлығаш Жүсіповамен хабарласқанымызда ол былай деді:
«Мәдениет саласы тарапынан «Наурызнаманың» әр күнінде белгіленген шаралар бар. «Қауышу күніне» орай «Өнер орталығында» концерт берілді. Облыстық қазақ академиялық музыкалық-драма театрында Ә.Оразбековтің «Бір түп алма ағашы» атты спектаклі сахналанды. Одан кейінгі «Қайырымдылық күніне», «Шаңырақ күніне» орай да белгіленген шаралар бар. Облыстық өлкетану музейінде салт-дәстүрге байланысты үлкен шара өткізіледі. Ал келесі «Ұлттық киім күніне» байланысты этнофестиваль өткізу жоспары тұр. Осылай «Наурызнама» жалғасып кете береді.
«Іс-шаралардың мақсаты – халқымыздың дүниетанымы, салт-дәстүр, әдет-ғұрпы мен жөн-жоралғы, наным-сенімін және ұлттық ұстанымын насихаттау. Асыл қазынамызды қайта жаңғыртып, жас ұрпақтың бойына сіңіру».
Шындығында мәдениет пен салт-дәстүр «Наурызнаманың» бір күніне белгіленгенмен, ол барлық күндерге орай өз көрінісін тауып отырады.
Өйткені, мәдениет пен салт-дәстүр – халықтың жаны, жарқын бейнесі.
Дүйсенбек АЯШҰЛЫ,
«Сыр бойы»
>>> Біздің Facebook, Instagram парақшаларымыз бен Telegram каналымызға жазылыңыз! <<<
