Эпидемиологиялық маусым басталған 1 қазаннан бері өңірде жедел респираторлы-вирусты инфекцияның (ЖРВИ) 16 786 жағдайы тіркелді. Бұл өткен жылдың осы кезеңімен шамалас. Өңірлік коммуникациялар қызметінің алаңында жауапты сала мен емдеу ұйымдарының басшылары көпшілікті алаңдатқан ахуал бойынша брифинг өткізді.
Облыстық денсаулық сақтау басқармасының мәліметіне сүйенсек, науқастардың 63,1 пайызы – балалар. Ауруға шалдыққандардың 5 пайызы ауруханаға жатқызылған. Халықты статистикадан бұрын аурудың сипатын өзгерткені қатты алаңдатып отыр.
– А типті (H3N2) тұмау немесе Гонконг тұмауы – жаңа вирус емес, маусымдық тұмаудың жыл сайын қайталанатын әрі бұрыннан белгілі түрі. Дегенмен, ол халықтың әлсіз топтары үшін қауіпті. Адамдар арасында тез таралуымен, аурудың ауыр ағымда өтуімен ерекшеленеді. Бастапқы медициналық-санитариялық көмек көрсету ұйымдарында 124 сүзгі кабинеті, ішек инфекциясының алдын алу үшін 52 ПОР кабинеті, білім беру ұйымдарында термометрия, ЖРВИ белгілері бар оқушыларды оқшаулау қолға алынды. Емханалардағы мобильді бригада қызметі түнгі сағат 12-ге дейін ұзартылып, жедел медициналық жәрдем бригадаларының саны 75-тен 81-ге көбейді. 200 төсекке арналған қайта жаңғыртудан өткен облыстық жұқпалы аурулар ауруханасы қосымша 100 төсек-орынға кеңейтілді. Ал көпбейінді облыстық балалар ауруханасында жоспарлы емге қабылдайтын бөлімшелер жұмысы уақытша тоқтатылып, пульмонология бөлімшесі 80 төсекке ұлғайды. Қажетті қорғаныш құралдары мен дәрілік препараттар қоры жеткілікті, – деді басқарма басшысының орынбасары Мая Мырзанова.
Эпидмаусымда жедел жәрдем телефонына тыным жоқ. Облыстық жедел жәрдем стансасының мәліметіне сүйенсек, 10 қараша күні 103 желісіне 2591 қоңырау түскен. Соның 55,2 пайызында бала ауырған. 439 науқас ауруханаға жеткізілсе, соның 60 пайызы жатып ем ала бастады.
– Аурудың өршуі себепті 103 нөміріне тәулігіне 2500-2600 шақыру түсетін болды. Сондықтан мобильді топтардың жұмыс уақытын кешкі сағат 8-ден түнгі сағат 12-ге дейін ұзарттық. 103 нөміріне аға дәрігерлер тарапынан ЖРВИ мен тұмау кезінде кеңес беру функциясын қостық. Ол арқылы тұрғындар қандай ем-дом жасауға болатынын сұрап біле алады. Тұрғындардың жиі жүгінуінен жедел жәрдем көлігінің кешігу жағдайлары да кездеседі, – дейді станса бас дәрігерінің орынбасары Ғалия Нұрсейітова.
Ол тұрғындар арасында түсініспеушілік тудырған жедел жәрдемнің неге екпе, литикалық қоспа салмайтыны туралы сұраққа жауап берді. Айтуынша, хаттама бойынша оның орнына нестероидты препараттар қолданумен шектеледі. Мамандар осы орайда халықты дүрбелеңге түспеуге, гигиеналық талаптарды қатаң сақтап, дәрігер кеңесін орындауға, аурудың алғашқы белгілері байқалған жағдайда уақытылы медициналық көмекке жүгінуге шақырды.
Облыстық жұқпалы аурулар ауруханасында осы күні емделіп жатқандардың 66,8%-ы – ЖРВИ жұқтырғандар. Тіпті бір үйден 4-5 бала жаппай ауру жұқтырып, бірге ем қабылдап жатқандар бар. Жүктеменің көбеюінен қабылдау бөлімінің өзінде 3 бригада тәулік бойы жұмыс істеуге көшті. Емдеу ұйымында санитарлық індетке қарсы режим заңға сәйкес толығымен атқарылуда. Оған қажетті дезинфектанттар, антисептиктер, жеке қоғаныш құралдар қоры жеткілікті. Вирусқа қарсы осельтамивир қоры, капсула, бірреттік медициналық маска, симптоматикалық, дезинтоксикациялық, антибактериалды дәрілік препараттар қоры қажетінше жасақталған.
– Індеттің алдын алу мақсатында ересектер мен балаларды барынша көпшілік жерге бармауға, барған күнде де бетперде кию, антисептик қолдану сияқты жеке бастың сақтық шараларын қатаң түрде сақтауға, құнарлы тамақтану, шынығу арқылы иммунитетті күшейтуге, мақсатты топ өкілдерін тұмауға қарсы вакцина алуға шақырамыз. Үйде ауырып қалған жағдайда өз бетіңiзше емделмей, медициналық көмекке жүгініңіздер, – дейді аурухана бас дәрігерінің орынбасары Шарипа Әлиева.
Брифингте облыстық санитарлық-эпидемиологиялық бақылау департаменті басшысының орынбасары Әлия Әбдіқайымова ЖРВИ-мен сырқаттанудың ауыр ағымындағы 239 науқастың сынамасы ПЦР әдісімен тексеріліп, нәтижесінде зертханалық жолмен A типті (H3N2) 35 тұмау ауруы анықталғанын атап өтті.
– Тұмаудың алдын алу мақсатында эпидмаусымға жергілікті бюджет есебінен 85006 доза вакцина сатып алынып, бүгінгі күні 84 мыңға жуық азаматқа тұмауға қарсы вакцина салынды. Тұмаудан бөлек, бұл санатқа жатпайтын вирустарды анықтау мақсатында 202 сынама зерттеумен қамтылды. Нәтижесімен бұл санатқа кірмейтін 7 вирус анықталды, – деді ол.
Назерке САНИЯЗОВА,
«Сыр бойы»
