Өткен жылы әлеуметтік жағынан осал топтағы 520 қызылордалық «Бастау Бизнес» бағдарламасы бойынша қайтарымсыз грантқа қол жеткізді. Соның басым бөлігі арманындағы кәсібін мемлекет қолдауының арқасында жүзеге асырып келеді. Жергілікті ақпарат құралдарының өкілдері жуырда өңірлік коммуникациялар қызметі ұйымдастырған баспасөз туры барысында жұмысын жолға қойған бірқатар кәсіпкердің тыныс-тіршілігімен танысты.
Қайтарымсыз грантқа ие болғандардың бірі – мүмкіндігі шектеулі бала тәрбиелеп отырған Жанар Прекеева. Ол былтыр «Бастау Бизнес» жобасы аясында кәсіпкерлік негіздерін меңгеріп, мемлекеттің қаржылай қолдауына ие болған. Былтыр «Мансап» орталығымен келісім негізінде жұмыссыз азаматтарды оқытып, оларды өзінің тігін цехына орналастырды.
Жанар 17 жылға жуық уақыт білім саласында еңбек еткен. Еңбек жолын бизнеске бұрғанына еш өкінбейді. Мұны кездейсоқ таңдау деуге келмейді.
– 2017 жылы мұғалімдер білім жетілдіру мақсатында Англияға бардық. Сол сапар өмірімді өзгертті десем болады. Содан бастап менде «қазақтың қолөнерін неге шетелде танытпасқа?!» деген ой туды. Өзім балаларды тігіншілікке оқытқанмын, қолымнан келетін іс. Елге келгесін ештеңеге қарамастан ойымды іске асыруға кірісіп кеттім, – деді ол.
Негізі, тігін цехының жұмысы 8 жыл бұрын басталған. Қазір мұнда 15-тен астам адам жұмыс істеп жатыр. Олар қыз жасауын ғана емес, ұлттық үлгідегі көрпе-жастықтар мен сәнді жиынтықтарды да тігеді. Қай бұйымның да дизайнын Жанар өзі сызады әрі әрбір ұсақ-түйегіне дейін мән береді. Осындай эксклюзив дүниелерге еліміздің батыс өңірінен, тіпті алыс-жақын шетелдерден тапсырыс бретіндер жетерлік. Өзге мемлекеттерде тұратын қандастарымыз кәдесыйдан бастап көрпе-жастыққа дейін алдырады. Кәсіпкер шетелде қолөнер жұмысы жоғары бағаланатынын айтты.
Ал қала тұрғыны Гүлфира Шамаханова тұтынушыларын тәттілермен қуантып келеді. Ол қызығушылықпен басталған іс кейін күнделікті кәсібіне айналатынын сезбеген де.
– Сүйікті ісіңді табыс көзіне айналдыра білу адамға ерекше шабыт сыйлайды екен. Осы мақсатта екі жыл бұрын кондитерлік қабілетімді дамытпақ болып мемлекеттен қайтарымсыз грант иелендім. Ол қаржыға қажетті құрал-жабдықтар сатып алдым. Бүгінде кондитерлік кәсібім біртіндеп дамып келеді. Тұрақты тұтынушыларым бар, мерекелік торттар мен тәттілерге сұраныс толастаған емес, – деді жеке кәсіпкер.
Кезекті кейіпкеріміз көпбалалы ана Әсем Әлімова да – хоббиін бизнеске бағыттағандардың бірі. Ол «Аква әлем» жобасын қолға алып, көздің жауын аларлық балық түрлерін өсіріп отыр.
– Біз аквариум жасап, балықтарды көбейтуге көңіл бөлеміз. Аквариумды қолдан кесіп, силикон арқылы жабыстырамыз. Ал су маржандарын Тайланд пен Индонезиядан алдырамыз. Бүгінде бізде балықтың 30-ға жуық түрі бар. Олардың күтімі бөлек. Біздің өңірде бұл таңсық іске сұраныс жоғары, басқа жақтан да тапсырыс беретіндер бар, – деді ол.
Кәсіпкерлік саласын дамыту мақсатында әлеуметтік қорғауға мұқтаж азаматтарды қолдау үшін мемлекет тарапынан қайтарымсыз гранттар беру жалғасады. Биыл «Мансап» орталығы арқылы шағын бизнесін ашуға ниетті 476 қызылордалыққа грант беру жоспарланып отыр.
– Ол 400 айлық есептік көрсеткіш көлемінде. Қайтарымсыз қаржыны көпбалалы аналар, ерекше қажеттілігі бар бала асыраушы, атаулы әлеуметтік көмек алушы, мүмкіндігі шектеулі адамдар, қандастар ала алады. Биыл сәуір, мамыр айларында комиссия отырысы өтпек, – деді Қызылорда қалалық «Мансап» орталығы филиалының директоры Жақсылық Төлегенов.
Өкінішке қарай, бюджет қаражатын орынсыз жұмсайтындар да табылады. Мысалы, өткен жылы 97 адамның грантты мақсатсыз пайдаланғаны анықталды. Сөйтіп, сот шешімімен олар алған сомасын мемлекет бюджетіне қайтаруға міндеттелді.
Назерке САНИЯЗОВА,
«Сыр бойы»
>>> Біздің Facebook, Instagram парақшаларымыз бен Telegram каналымызға жазылыңыз! <<<
