Облыста көктемгі мерзімді әскери қызметке шақыру науқаны басталды. Биыл өңірден 800-ден астам азамат әскерге аттанады. Бұл туралы өңірлік коммуникациялар қызметінде өткен брифингте облыстық қорғаныс істері жөніндегі департамент бастығы орынбасарының міндетін атқарушы Нұрлыбек Сейтханов хабарлады.
Оның айтуынша, наурыз-маусым айлары аралығында жас сарбаздар ҚР Қарулы күштері мен өзге де әскери құрылымдар құрамында Отан алдындағы борышын өтейді.
– Көктемгі шақырылым кезінде өңірден 800-ден астам азамат әскери қызметке, атап айтқанда ҚР ҰҚК Шекара қызметіне 100, Қарулы күштер қатарына 400, Ұлттық ұланға 300, Мемлекеттік күзет қызметіне 15, Төтенше жағдайлар министрлігіне 30-ға жуық азамат жіберіледі. Бұл – ел қауіпсіздігін қамтамасыз етудегі маңызды қадам. Әскер қатарына елімізді қорғауға қабілетті, денсаулығы мықты, дене бітімі шыныққан, білім деңгейі жеткілікті және моральдық-іскерлік қасиеті жоғары азаматтар іріктеледі. Борышты өтеу кезінде жастарды тәртіп пен жауапкершілікке, отансүйгіштікке баулиды, – дейді Нұрлыбек Қалыбекұлы.
Науқанда шақыру контингенті тиянақты зерделенеді. Шақырушылармен, олардың ата-аналарымен әңгімелесу жүргізіледі. Бұл шараның жастарды әскери бөлімдер бойынша іріктеу мен бөлу кезінде маңызы зор.
Сондай-ақ жас сарбаздар алдымен медициналық тексерістен, заң талаптарына сәйкес сараптамадан өтеді, моральдық-психологиялық дайындығы ескеріледі. Барлық ұйымдастыру жұмыстары қолданыстағы нормативтік-құқықтық актілер негізінде жүргізіледі.
Сара АДАЙБАЕВА,
«Сыр бойы»
