Қызылорда облысының білім басқармасы және Қызылорда жоғары көпсалалы колледжінің ұйымдастыруымен «Кәсіптік-техникалық мамандықтар: еңбек нарығының сұранысы мен болашағы» атты облыстық семинар өтті.
Семинар қонақтары колледждің оқу үдерісіне негізделген заманауи материалдық-техникалық базамен танысып, робототехника кабинеті, электрмен қамтамасыз ету, агротехника, автокөлік жөндеу, ветеринария, тігін шеберханасы, құрылыc кабинеттері, бағдарламалау зертханасы, музей және кітапхана бөлімдерін аралады. Арнайы жабдықталған оқу орындары білім беру сапасын арттыруға және болашақ мамандардың құзыреттілігін дамытуға бағытталғаны атап өтілді.
Жиын барысында техникалық және кәсіптік білім беру бөлімінің басшысы Бекжан Есенбаев, облыстық кәсіпкерлер палатасының директоры Пірмұхаммед Сыздық, И.Әбдікәрімов атындағы Қызылорда политехникалық жоғары колледжінің директоры Абайбек Жүнісов, «Қызылорда жылу орталығы» МКК өкілі Нұрлан Байкен және Қызылорда жоғары көпсалалы колледжінің директоры Маржан Бисенова сөз сөйлеп, кәсіптік білім беруді дамыту бағыттары талқыланды.
Колледж директоры Маржан Қылышбайқызы өз сөзінде еңбек нарығында сұранысқа ие кадрлар даярлаудың маңызын атап өтті:
«2025 жылдың «Жұмысшы мамандықтар жылы» деп жариялануы кәсіпқойлық пен еңбексүйгіштік идеясын алға жылжытуға үлкен серпін береді. Колледжіміздің басты мақсаты – заманауи технологияларды меңгерген, кәсіби құзыреттілігі жоғары мамандар даярлау. Дуальді оқытуды дамыту арқылы студенттер теорияны өндірістік тәжірибемен ұштастырады. Бүгінде білім алушылардың 60%-ы өндірісте тәжірибе жинақтап, түлектердің 80%-дан астамы мамандығы бойынша жұмысқа орналасып отыр. Студенттеріміз WorldSkills чемпионаттарында жүлделі орындарға ие болып, халықаралық деңгейдегі талаптарға сай біліктілігін дәлелдеуде», – деді ол.
Семинар аясында «Болашақ маманның бір күні» атты Workshop Vision ұйымдастырылып, қатысушылар өзара пікір алмасты және ұсыныстар жасады. Сонымен қатар, «Атамекен» өңірлік кәсіпкерлер палатасы және «Қызылорда нан» ЖШС мекемелерімен ынтымақтастық туралы меморандумға қол қойылды.
«СБ» ақпарат
