Мәдениет және өнер қызметкерлері күні қарсаңында елімізге танымал жыршы, республикалық, халықаралық жыршылар байқауының жүлдегері, жерлесіміз, Арал аудандық мәдениет орталығының үйірме жетекшісі Тәңірбергенов Айбек Жақсанұлы Мемлекет басшысы Қасым-Жомарт Кемелұлының қолынан «Ерен еңбегі үшін» медалін алды.
Жыршылық өнер жолында әкесі Жақсаннан тәлім алып, ағасы Бекұзақ Тәңірбергенов, ұстазы Сұраған Мырзаев сынды жыр жүйріктерінің ізіне ілескен Айбек Жақсанұлы жастайынан осынау дәстүрлі өнерді дамыту жолында қызмет етіп келеді.
Бүгінде жыршының репертуарында Сыр сүлейлері мен шайырларының терме-толғаулары, жыр-дастан, қиссаларымен бірге, «Қира ат» дастаны, «Көк арғымақтың баласы», «Көлімбет жыры» сияқты бірнеше тарихи туындылары бар. Жыршылықты, ақындықты, сазгерлікті қатар алып жүрген Айбек Тәңірбергеновтің бірқатар өлеңдері эстрада жанрында да кең таралған. Талантты жыршының дауысы «Алтын қорға» және «Қайталанбас дауыстар» музыкалық антологиясына жазылған.
«Айбек Жақсанұлының жыр қоры өте бай, атадан балаға мирас болған өнердің туын жықпай, Сыр өңірінің рухани-мәдени дамуына өз үлесін қосып келеді. Алдыңғы буыннан үйренгенінің қыр-сырын кейінгі ұрпаққа насихаттау жолында еңбек етіп, шәкірт тәрбиелеуде.
«Сыр елі – жыр елі» атанған қасиетті туған жеріміздің мәртебесін биіктетіп, зор жетістікке жеткен Айбек Тәңірбергеновке алғыс білдіремін.
Бұл біздің аймақтың мәдениет саласына, рухани қазынамызды көздің қарашығындай сақтап, кейінгі ұрпаққа мұра етуге талпынған өнер адамдарының еңбегіне берілген жоғары баға деп білемін», – деп жазды облыс әкімі Нұрлыбек Нәлібаев әлеуметтік желідегі парақшасында.
Мемлекеттік марапат иесін аймақтың өнер өкілдері құрметпен күтіп алды.
«СБ» ақпарат
