Денсаулық сақтау министрлігінің хабарламасына қарағанда, 1 мамырдан бастап мобильдік бригадалардың жұмыс тәртібі өзгереді. Дегенмен жедел жәрдем қалыпты режимде жұмыс жасай бермек. Бұл туралы «Қазақпаратта» жазылған.
Жедел жәрдемнің келуін ұзақ күтушілер айтқан шағымдарға байланысты әрі шұғыл қызмет жұмысының тиімділігін арттыру мақсатында емханалар жанындағы жеделділіктің 4-санатындағы шақыртуларға қызмет көрсететін мобильдік бригадалар жұмысының қағидаларына өзгерістер енгізіп отыр.
Жеделділіктің 4-санатындағы шақыртулар пациенттің өмірі мен денсаулығына тікелей және ықтимал қауіп жоқ, пациенттің өміріне қауіп төндірмейтін, бірақ медициналық араласуды қажет ететін жағдайларға қатысты.
Сонымен, 1 мамырдан бастап емханалар жанындағы мобильдік бригадалар жұмыс уақытында, яғни 8:00-ден 20:00-ге дейін жұмыс істейді. Өмірге қауіп төндірмейтін жеделдіктің 4-санатындағы шақыртулар (мысалы, жоғары қысым, температура, жеңіл жарақаттар) емханалардың жұмыс уақытында МСАК мобильдік бригадаларына қайта бағытталады. 20:00-ден кейін және демалыс күндері барлық шақыртуларға, соның ішінде 4-санатқа, бұрынғыдай, жедел жәрдем бригадалары қызмет көрсетеді.
Мобильді телефондарды міндетті тіркеу
Елімізде мобильді телефондарды міндетті тіркеу 2025 жылдың 26 мамырына дейін ұзартылған болатын. Бұл туралы Цифрлық даму, инновациялар және аэроғарыш өнеркәсібі министрлігінің хабарын «Қазақпарат» жариялаған.
Еске салсақ, осы жылдың 25 наурызынан бастап, Қазақстанға әкелінген барлық мобильді құрылғы GSMA халықаралық базасында және мемлекеттік жүйеде міндетті верификациядан өтуі тиіс.
Бизнес өкілдерімен бірнеше кездесу өткізілгеннен кейін қосымша 60 күн уақыт беру туралы шешім қабылданды. Бұл импорттаушылар мен сатушыларға бұрын әкелінген, бірақ әлі сатылмаған құрылғыларды тіркеуге мүмкіндік береді. Осылайша, бизнеске барлық мобильді құрылғыны тіркеу үшін тағы екі ай беріледі. Құрылғыларды https://kz-imei.kz/ порталында заңдастыру қажет. Верификациядан өтуге 60 күн беріледі. 2025 жылдың 26 мамырынан бастап заңдастырылмаған құрылғылар мобильді байланысқа қосылу мүмкіндігінен шектеледі, делінген хабарламада.
Жаңа әуе рейстері
Көлік министрлігінің Азаматтық авиация комитеті тұрақты негізде жаңа халықаралық әуе бағыттарын ашу жұмыстарын жүргізуде. Осылайша, 27 мамырдан бастап «SCAT» әуе компаниясы «Шымкент – Будапешт», «Шымкент – Мюнхен», «Шымкент – Каир», «Шымкент – Шанхай», «Шымкент – Сеул», «Шымкент – Сиань», «Шымкент – Үрімші» жаңа халықаралық бағыттарын ашпақ.
«Air Astana» әуе компаниясы да 14 мамырдан бастап «Астана – Дананг», «Атырау – Тбилиси», «Алматы – Ош», «Атырау – Баку» бағыттарына қатынайды.
«Qazaq Air» әуе компаниясы 1 мамырдан бастап «Астана – Түркістан – Самарқанд» жаңа халықаралық бағытын аптасына 2 рейс жиілігімен іске қосады.
«Fly Arystan» әуе компаниясы 18 мамырдан бастап «Алматы – Инин» бағытына қатынай бастайды.
Сондай-ақ, «Eastar Jet», «TWay», «Spice Jet», «Air Cairo»,«Thai Air Asia X» сияқты бірқатар шетелдік әуе компаниясы Қазақстан Республикасына жаңа рейстер ашуда.
Ақпарат көздерінен дайындаған
Гүлжазира ЖАЛҒАСОВА,
«Сыр бойы»
