Тұмаудың күшейген шағында ел ішін алаңдаушылық билегені рас. Ауылда да сырқаттанғандар көбейіп, әр шаңырақта қиындық сезілді. Осындай сәтте ақ халатты абзал жандардың жанкешті еңбегі айқын көрінеді. Мен де осы өршіген тұмаудың кесірінен сырқаттанып, Қызылқұм дәрігерлік амбулаториясына жүгінуге тура келді. Расын айтсам, сегіз күн бойы сол жерден мейірім мен жауапкершіліктің нағыз мектебін көрдім.
Ауылдық жерде медицина қызметкері болу – үлкен ерлікпен пара-пар еңбек. Қаладағыдай толық құрал-жабдық, мол мүмкіндік жоқ. Соған қарамастан, Қызылқұм дәрігерлік амбулатория қызметкерлері өздеріне жүктелген міндетті мінсіз атқарып келеді. Әр келушіні жылы жүзбен қарсы алып, қолынан келген бар көмегін көрсетеді. Ең бастысы – дәрігерлігімен бірге адамгершілік қасиеттері де биік.
Айта кетерлігі, бұл дәрігерлік амбулатория негізі 1965 жылы Қызылқұм совхоз болып құрылғанда ауылдық аурухана болып қаланған. Алпыс жыл бойы талай науқасқа өмір сыйлаған, талай отбасыны қуанышқа бөлеген. Мен білетінде, Кәдірбаев Пазылбек, Жұмахметов Ханафи, Тәуекелов Жанай атты медицина саласының марқасқалары еңбек етті. Кейінірек Жұматаева Зиба, Омарова Дәмегүл басшылық жасап, ауыл тұрғындарының денсаулығы үшін аянбай қызмет жасады.
Ауылдық аурухана дәрігерлік амбулатория болып, қайта құрылымдалып, 2023 жылы жаңа ғимаратқа көшірілді.
Облыс әкімі Нұрлыбек Нәлібаев кең әрі заманауи ғимараттың лентасын қиып, тұрғындарға табыстаған сәт ауыл жұртшылығы үшін үлкен қуаныш еді. Бүгінде сол жаңа ғимараттың ішінде ауыл тұрғындарының денсаулығы үшін тер төгіп жүрген абзал жандардың еңбегі тіпті еселене түскендей.
Мен емхана табалдырығын аттаған алғашқы күннен-ақ өзімді қамқорлық ортасына енгендей сезіндім. Медбикелер жағдайымды мұқият тексеріп, қажетті ем-домды дер кезінде тағайындады. Олар уақытылы екпесін салып, тыныс ашатын процедуралар жасап, әр күн сайын жағдайымды қадағалап отырды.
Бұл ретте амбулатория меңгерушісі Төлеген Арайлым Қайратқызы біліктілік арттыру курсында жүргеніне қарамастан, ұжым жұмысы жүйелі ұйымдастырылған. Уақытша басшылық аға мейіркеш Рутел Жансаяның жауапкершілігінде, оны абыроймен атқарып отыр. Ұжымды үйлестіріп, күнделікті қызметтің бір сәтке тоқтамауын қамтамасыз етіп жүрген жанға үлкен ризашылық білдіремін.
Аға мейіркештің айтуынша, биыл тұмаудың алдын алу шаралары ертерек қолға алынып, ауыл тұрғындарының есепте тұрғандары мен зейнеткерлерге жоспарлы түрде тұмауға қарсы вакцина егілген. «Уақытылы жасалған вакцина – аурудың асқынбауына үлкен себеп болды», – дейді ол.
Сондай-ақ тәжірибелі мамандар әлеуметтік мейіркеш Оспанова Света мен моб мейіркеш Нағметулла Райсаның кәсібилігі мен жылдар бойы қалыптасқан жауапкершілігі әр науқасқа көрсетілген қызметтерінен анық көрінеді. Ал жас мамандар: фельдшер Қалыбай Әлислам, акушер Тастыбай Айдана, егу мейіркештері Ізбасар Назерке мен Сәмбетова Жұлдызай және лаборант Байдос Гүлзат сынды ізденімпаз жастар таңертеңнен кешке дейін дамыл таппай, тұрғындарға қалтқысыз қызмет көрсетіп жүр.
Осы тұста айта кететін жайт, Қызылорда медициналық колледжінің 1-курс студенті Махамбет Жансая да дәл осы ұжымда тәжірибе жинақтауда екен. Осындай абыройлы әрі үлгілі ұжымнан үйреніп, іс жүзінде білігін шыңдауы болашақ маман үшін үлкен мектеп, өмірлік сабақ әрі кәсіби жолындағы құнды бастау екеніне күмән жоқ.
Емдеу ісінің көрінбей тұратын, бірақ өте маңызды бір қыры – тазалық пен тәртіп. Бұл бағытта техникалық қызметкерлер Өтеген Ұлбибі, Нұрқожа Табиға, Қожахметов Сердалы және Қожақов Серіктің еңбегі ерекше. Мекеменің ішкі-сыртқы тазалығы, жылуы, жайлылығы – олардың күнделікті елеусіз, бірақ бағалы қызметінің нәтижесі.
Олардың ізеттілігі, сабырлылығы, жылы сөзі жанға демеу болды. «Ауырып ем іздегенше, ауырмайтын жол ізде» деген қазақы тәмсілдің өзі осындай жанашыр жандардың еңбегіне қарап айтылғандай.
Қызметкерлердің барлығы – өз ісінің нағыз мамандары. Әсіресе, халыққа жақындығы, ауыл тұрғындарының денсаулығын шынайы ойлауы, алғыс күтпей атқаратын еңбегі – қандай құрметке де лайық. Әрбір науқастың жағдайына үңіліп, қолынан келгенін аямайтын мұндай ұжымның болуы – ауыл үшін үлкен олжа.
Қызылқұмның қысы қыр астында тұрған шақта, тұмаудың тырнағына іліккен біз сияқты талай жанға демеу болып жүрген дәрігерлік амбулатория қызметкерлеріне айтар алғысымыз шексіз. Бұл – менің ғана емес, ауыл халқының ортақ ризашылығы деп білемін.
Медицина – жүрек пен жанның мамандығы. Ақ халаттылардың жүгі ауыр, жауапкершілігі орасан. Дегенмен, осы жолды таңдаған Қызылқұм дәрігерлік амбулатория қызметкерлері қай сәтте де кәсібилік пен парасаттылықтың үлгісін көрсетіп келеді.
Алғашқы байлық – денсаулық болса, сол денсаулықтың күзетшісі болып жүрген сіздердің орындарыңыз әрқашан биікте болғай.
Сәкен ҚАБЫЛОВ.
Кәукей ауылы,
Қазалы ауданы
