Мереке күндері жұрт демалып, отбасында атап өтіп, мәре-сәре болып жатқанда тынымсыз жұмыс істеп, үздіксіз қызмет көрсететін сала қызметкерлері бар. Былайғы күндері де тынымсыз еңбек ететін олар мерекелерде тіпті қарбалас күйге түседі. Жаңа жылдың алғашқы жұмыс аптасының басында демалыс күндері үздіксіз жұмыс істеген мекеме өкілдері, атап айтқанда, облыстық төтенше жағдайлар департаменті мемлекеттік өрт бақылау басқармасының бастығы, азаматтық қорғау полковнигі Асхат Оразбеков, облыстық денсаулық сақтау басқармасы басшысының емдеу-алдын алу жұмыстары жөніндегі орынбасары Жаңыл Абубакирова, Қызылорда облысы әкімі аппараты Жедел әрекет ету орталығының директоры Бағлан Терлікбаев өңірлік коммуникациялар қызметінде брифинг беріп, мереке күндері атқарған жұмыстары туралы айтты.
Асхат Оразбековтің айтуынша, ТЖД бөлімшелері күшейтілген жағдайда жұмыс істеген. Кезекшілік уақытында 22 жедел шығу болған, оның ішінде 4 өрт, 10 өртке жатпайтын жану оқиғасы, 2 авариялық құтқару жұмысы, 6 басқа да шығыс, күшейтілген кезекшілік уақытында 4 техногенді төтенше жағдай тіркелген.
– Қазіргі уақытта жағдай тұрақты, тіршілікті қамтамасыз ететін және коммуналдық нысандар штаттық режимде жұмыс істеуде. Республикалық және облыстық маңызы бар автомобиль жолдарында төтенше жағдай тіркелген жоқ, барлық бағыттағы автокөлік жолы ашық. 31 желтоқсан мен 4 қаңтар аралығында «Қазгидромет» Қызылорда филиалы 4 дауылды ескерту берді. Барлық ескертулер алгоритмге сәйкес өңделіп, жолданды (смс, «Дәрмен» қосымшасы, электронды пошта арқылы).
Облыс бойынша орта есеппен 164 қызметкер, 45 техника, 1 кинологиялық есеп, 8 ұшқышсыз ұшу аппараты және 1 тікұшақ күшейтілген кезекшілікке жұмылдырылды, – деп атап өтті Азамат Плалұлы.
Облыс бойынша 75 жедел жәрдем тобы жұмыс атқаруда. Онан бөлек, мереке күндері БМСК ұйымдарының жанында 29 мобильдік топ қысқартылған режимде жұмыс істеді.
– 31 желтоқсан мен 4 қаңтар аралығында 103 желісіне түскен шақырту саны – 6700, оның 2100-і бала.
Демалыс күндері 31 жол-көлік оқиғасы болып (қала – 10, аудан – 21), 54 адам зардап шеккен, оның 13-і ауруханаға жатқызылды.
Оған қоса 954 науқастан жедел респираторлы-вирусты инфекция диагнозымен шақырту түскен, 180-і тасымалданып, 140 науқас стационарда ем қабылдап жатыр, – дейді Жаңыл Абубакирова.
Айта кету керек, жаңа жыл түні облыста 54 сәби дүниеге келді. Оның 25-i ұл, 29-ы қыз.
– Барлық қызметтер толық дайындық режиміне келтірілді. Коммуналдық, төтенше жағдайлар және қоғамдық қауіпсіздікке қатысты мәселелерге ерекше бақылау орнатылды. Жауапты мемлекеттік органдармен және қызметтермен өзара іс-қимыл күшейтілді. Азаматтардың өтініштеріне уақытылы және сапалы жауап беру басты назарда болды. «112» желісіне 3583 хабарлама түсті. Оның ішінде өрт оқиғасы туралы (101) – 12, төтенше жағдайлар (112) – 9, құқық қорғау сипаты бойынша (102) – 1594, анықтамалық және басқа да хабарламалар – 1947. Тәулігіне өтініштерді қабылдау мен тіркеудің орташа саны – 717.
112 нөмірі арқылы шұғыл сипаттағы 1615 хабарлама қабылданып, жедел әрекет ету қамтамасыз етілді. «109» желісіне 1973 өтінім түскен, 1904-і (96,5%) орындалды. Барлық өтініш жедел түрде тіркеліп, полиция, жедел медициналық жәрдем, төтенше жағдайлар департаменті және коммуналдық қызметтерге уақытылы жолданды. Жаңа жыл мерекесі кезінде қызметтердің үйлесімді жұмысы нәтижесінде әлеуметтік тұрақтылық пен тұрғындардың қауіпсіздігі қамтамасыз етілді, – деді Бағлан Бекентайұлы.
Айнұр БАТТАЛОВА,
«Сыр бойы»
