Алмагүл Божанқызы туралы өткен шақ кейіпкері ретінде жазу қиын болғанымен еске алу сәттерін қағаз бетіне түсіріп, кейінгі ұрпаққа өнегелі өмір жолдарын дәріптеу біздің замандастарымыздың азаматтық парызы деп бағалаймын. Шындығы да сол, біз айтпасақ кім айтады?! Адамзаттың саналы перзенттері өздері өмір сүрген қоғамның тарихын өздері қалыптастырып жазып кетпесе, өмір шындығын сол көзкөргендерінің сараптамадан өткен пайымдауларымен қорытынды жасап, ой бөліспесе, кейінгі тарих билік басына келген «шенділердің» саяси құрбанына айналып кетуі мүмкін…
Алмагүл Божанқызын білетінімізге де елу бес жылдың белесінен аттаған екен. Облыстың комсомол – жастар ұйымдарын басқарған уақыттан бастап бірге болдық. Комсомол біздің өмірімізде азамат болып қалыптасуымызға, елді танып, білуімізге, тұрғындардың әлеуметтік мәселелерін шешудегі түйінді кедергілерді анықтауға, халқымыздың өткені мен болашағын бағдарлап білуге, мемлекетімізді нығайтудың негізін айқындауға, тұрақты өмірлік саяси көзқарасымызды қалыптастыруға, біз өмір сүрген қоғамның қай формациясы болмасын тек адамға қызмет жасау үлгісін зерделей білуге, оны өмірге енгізуге, ұлттық намысымызды оятуға негіз қалаған кең ауқымды өмір мектебі болды.
Ал осы қасиеттердің адам бойында қалыптасуы да туған жер топырағының киелілігінде жатса керек. Ауданның жастар ұйымын басқарып, саяси жұмыстардың сан қырлы әдістерін меңгерген Абылай Хангерейұлы Айдосовтың, Сейілбек Шаухамановтың, Алмагүл Божановалардың кейінгі қызмет дәрежелері бүкіл Сыр бойына аян. Тереңөзек өңірі халқының ауызбіршілігі мол, бір мақсатта еңбек ете алатын қасиетті аймақ болғанын бүкіл ел біледі. Сондықтан да Алмагүл Божанқызының өмір жолының, алған тәрбиесінің басқаша болуы мүмкін емес еді.
Өмір жолымызда әріптестігіміз облыстың мемлекеттік құрылымдарының әртүрлі салаларында жалғасын тапты. Қоғамда болып жатқан өзгерістердің барлығына да куәгер болдық. Жетістіктерімізге қуандық, кемшіліктерімізге күйіндік. Барлық уақытта болашаққа деген сеніміміз жоғалмаған, ұрпақтар сабақтастығын жалғастыруға аға буын өкілдерінің, замандастарымыздың өнегелі істерін кейінгі ұрпаққа жеткізуге бар өмірлік тәжірибемізді пайдаландық.
Оның ерекше қасиеті: өзінің туған жеріне қатысты мәселелерді шешуде табандылық көрсете білуі, әділеттік атаулыны өзіне жан серік етіп таңдап алуы, қызметтің елінің жақсы өмір сүруіне арнаған перзенттік міндеті екенін басқаларға үлгі ете білуі еді.
Осылардың айғағы ретінде өзінің туған ауданында балабақша меңгерушілігінен бастап аудандық комсомол комитетінің бірінші хатшысы, мектеп директоры, аудандық партия комитетінің хатшысы, аудандық кеңес атқару комитетінің төрағасы, аудан әкімі болып табаны күректей қырық жылға жуық абыройлы қызмет атқару Алмагүл Божанқызына артылған жоғарғы биліктің де, халқының да үлкен сенімі еді. Облыстағы жоғарғы өкілетті орган – мәслихаттың хатшысы болып сайлануы Алмагүл Божанқызына бұрынғыдан да зор жауапкершілік жүгін жүктеді. Бәріміз де сол уақыттың куәгері болғанымыз шындық. Бұрыннан қалыптасқан өмірлік тәжірибесін жаңа заманға лайықтап жетілдіре отырып, облыс тұрғындарының әлеуметтік жағдайын жақсарту жолында облыс әкімшілігімен бірлесіп жұмыс жасады. Алмагүл Божанқызының ұйымдастыру қабілетінің шыңдала түсуіне «Отан» республикалық саяси партиясының филиал төрағасы болып сайлануы да себепші болды. Бұрынғы комсомол, партия жұмыстарында әріптес болған достар, менің жаңадан құрылған партия филиалы төрағасының бірінші орынбасары болып қызмет атқаруыма тура келді.
Шындығында, сол кездері бағыт, мақсат айқындалғанымен, оның қозғаушы күштері әртүрлі ағымдағы партиялар демократия ұғымын желеу етіп, өз бетінше қимыл жасады, жан-жаққа тартқылады. Ортақ мақсат үшін – қазақ елінің егемендігін негіздеуге, экономикалық қуатын арттыруға, халықтар достығын, ынтымағын баянды етуге жайбарақаттылық байқалды. Айтуымыз керек, осы уақыттарда жаңа партияның облыстағы рөлін нығайтуға Алмагүл Божанқызымен бірге дамылсыз жұмыс істеуге тура келді. Бұл өмір шындығы. Сол уақыт кезеңінде жанында болған азаматтар жақсы біледі. Шынайы бағасын беретін де уақыт екенін білеміз.
Бүгінгі күні оның өнегелі жолын өскелең ұрпаққа жеткізу міндетін алға қойғанбыз. Осы мақсатта зейнеткерлікке шыққаннан кейін «Ұрпақтан ұрпаққа» қоғамдық бірлестік құрып, осы істердің басы-қасында болған Алмагүлдің еңбегі ұшан-теңіз. Елге, қоғамға қызмет жасаудың үлгісін көрсетті. Ұрпақ санасына ізгілік нұрын сіңіруге барынша күш-қайратын аяған жоқ. Өмірінің соңғы жылдарының әрбір күнін ескерусіз қалдырмай күнделік жазды. Баспадан кітаптар етіп шығарды. Өткен өмір жолына өз әріптестерінің, замандастарының алдында Сыр бойының азаматы ретінде есеп берді. Ерекше тұрғыда есеп берді. Өзінің артына өшпес мұра қалдырды. Өзі тұрған үйіне, өзі туралы, замандас-әріптестері туралы музей ұйымдастырып, салтанатты жағдайда өз дастарқанының басында Сырдария ауданының әкімі Берік Сарменбаевқа табыстады. «Ешқандай қайтарымсыз дүние деп қабылдаңыз» деді. Өмірінің соңғы аптасының бір күні де бос болған жоқ. Есеп берді, достарымен жүздесіп, сырласты, телефонмен де хабарласты, шаршағанын білдірмеді. Бұрынғысынша жайдарлы көңілімен, әзіл сөздерімен, өз қатарластарына аманат ретінде көпшілікке ой салатындай тілек айтты. Бойынан тіршіліктің қуаты кеткенше көз жанарынан жалынды жастықтың сәулесі нұр шашып тұрғандай болды. Қазақтың қайсар қызына тән мінез көрсетіп, бұл жарық дүниедегі өмірмен қоштасудың да үлгісін көрсеткен ерекше жан болып біздің жадымызда мәңгілікке сақталады.
Сайлаубай ӘБІШҰЛЫ,
«Қазақстан Республикасының алтын жұлдызы» төсбелгісінің иегері, облыстық
«Ұрпақтан ұрпаққа» қоғамдық бірлестігінің төрағасы
