Осыдан екі жыл бұрын қазан айында облыс әкімі Нұрлыбек Нәлібаев «Саутс-Ойл» компаниясының президенті Серікжан Сейітжановпен Қызылорда қаласының сол жағалауынан 650 орындық музыкалық колледж ғимаратын салу жобасы бойынша ынтымақтастық туралы келісімге қол қойған болатын. Өткен жылы көктемде аймақ басшысының қатысуымен колледждің жаңа ғимаратының іргетасы қаланды.
Осы уақытқа дейін ыңғайластырылған типтегі ескі нысанда орналасқан өнер ордасы өткен жексенбіде сәні мен салтанаты келіскен жаңа ғимаратқа көшті. Сыр жұртшылығы бұл қуанышты сәтті ерекше ықыласпен қарсы алды. Өнерсүйер қауым үшін бұл – тек жаңа мекен емес, шығармашылықтың жаңа белесі болмақ.
Салтанатты сәтте облыс әкімі Нұрлыбек Нәлібаев сөз алып, өнер ордасы талай мықты шәкірттер тәрбиелейтін қарашаңыраққа айналатынын атап өтті.
– Елу жылға жуық тарихы бар Қазанғап атындағы Қызылорда музыкалық жоғары колледжі Сыр топырағында ұрпақтан ұрпаққа жалғасқан мәдени мұраның, ұлттық өнердің кемелденуіне зор үлес қосып келеді. Бүгінге дейін оқу орны талапқа сай келмейтін ескі ғимаратта қиындықтарға қарамастан жастарға білім беріп, өнерге баулыды. Жаңа ғимаратта студенттерге барлық жағдай жасалған. Үлкен концерт, би залдары, хор бөлмесі бар. Кең музыкалық пәндік кабинеттер жаңа заманауи құрал-жабдықтармен қамтылған. Материалдық-техникалық базасы заман талабына сай келетін 200 орындық жатақхана шалғай елді мекеннен келген жас өрендерді қабылдауға дайын.
Күн сайын жаңарып, жасарған Сыр өңірінің жаңа келбетіне көрік берген музыкалық колледждің ғимаратын салуға демеушілік жасап, қолдау көрсеткені үшін «Саутс-Ойл» компаниясының басшысы, елімізге белгілі меценат Серікжан Сейітжанұлына барша Сыр жұртшылығының, өзімнің атымнан шынайы ризашылығымды білдіремін. Бұл ұлтымыздың тарихи «Қазақ» атауының қайтарылғаны және Қызылорданың астана болғанының 100 жылдық мерейтойына үлкен тарту болды. Жаңа нысан баршамызға құтты болғай! – деді аймақ басшысы.
Салтанатты шарада Серікжан Сейітжанов пен Сенат дупутаты Руслан Рүстемов жаңа ғимараттың ашылуымен құттықтап, ізгі тілектерін жеткізді.
– Мәдениет – ұлттың мәйегі. Мәдениет – ең алдымен жәдігерлік.
Өнер – халықтың қазынасы, ұлттың құндылығы. Осы орайда, Мемлекет басшысы Қасым-Жомарт Кемелұлы Тоқаевтың халықшыл бастамалары аясында елімізде мәдениет пен өнер саласы да өркендеп келеді. Мәселен «Анаға тағзым», «Отбасы орталығы», көпфункционалды 1000 орындық «Өнер орталығының» салынып, жаңадан симфония оркестрі, инклюзив театр, жастар театры, заманауи би, хор ұжымдары жасақталды. Сондай-ақ Сыр мәдениетінің негізгі бренді – жыраулық дәстүр өкілдерінің «Жыраулар үйі» ашылды. Барлық аудандарда ішінде неке қию залы, кітапхана, музей, мұрағат, жастар сарайы, ардагерлер мен аналар үйі бар «Руханият орталықтары» пайдалануға берілді. Мәдениет ұжымдарына алғаш рет жаңадан көпқабатты тұрғын үй салынып, 40 қызметтік пәтер табысталды.
Мәдениет және өнер, әдебиет өкілдерін қолдау мақсатында өткен жылдан бастап «Тұран» сыйлығы дәстүрлі түрде жыл сайын табысталуда.
Өнер ұжымдарын сақтап қалу мақсатында Нұртуған, Жиенбай, Нартай, Манап, Сыр сүлейлері мектептерін жандандыруға, олардың ізбасарларын дайындауға, Нартай Бекежанов атындағы қазақ музыкалық драма театрын, филармонияны, ауылдық клубтарды қайта жасақтауға күш салынды.
Еуропадағы бірнеше мемлекетте Қызылорда облысының мәдениеті мен өнері күндері сәтті өткізілді. Міне, серпіліс сәулесі осылай жарқырай бастады. Сыр саңлақтары халықаралық деңгейдің жаңа белесіне шықты.
Ұлтымыздың «Өнерліден өнеге ал, таланттыдан тәлім ал» деуі тегін емес. Себебі, өнер – он іспен тең, өнерпаз – он кісімен тең деген баға бар. Жаңа оқу ғимараты мәдениет пен өнердің игілігіне ұзағынан қызмет еткей, – деді Руслан Рүстемұлы.
Жиын барысында жаңа ғимараттың салынуына үлес қосқан құрылысшылар мен колледж педагогтері марапатталды.
Айта кетейік, музыкалық колледждің жалпы құны 4 млрд 800 млн теңге. Білім ошағының салынуына «Саутс-Ойл» компаниясы демеушілік жасады. Аталған компания осы уақытқа дейін де Қызылорда қаласында «Нұрсәт» спорт кешенін, Аралдағы «Қамыстыбас» көлінің жағасына балалардың оқу-сауықтыру орталығын өз қаражаты есебінен салған.
