Қай кезде де қызылордалық «Қайсар» өз түлегімен мақтанады. Жергілікті таланттар команда намысын абыроймен қорғап, оның жетістігіне үлкен үлес қосып келеді. Десе де кейінгі жылдары түрлі себеппен олар негізгі құрамнан шет қалды. Салдарынан қызылордалық жастар өз мүмкіндігін көрсете алмай жүрді.
Биыл облыс басшылығының шешімімен команда қазақстандық футболшыларға сенім артты. Оған жанкүйерлер де қолдау білдірді. Қаншама жылдан бері команда құрамында легионерлер де ойнады. Алайда олардың шеберлік деңгейі жергілікті жастардан жоғары болған жоқ. Айналып келгенде, «Қайсар» турнир кестесінде ортанқол клубтың бірінен аса алмады. Ендігі кезекте қызылордалық түлектер алғашқы минуттан жасыл алаңға шығып, қазірдің өзінде жеңіске жетуге зор үлесін қосып жүр.
Қазір мамандар қақпашы Нұрымжан Салайдиннің шеберлігін жоғары бағалай бастады. Белгілі спорт журналисі Есей Жеңісұлы «Кейбір футболшылар өзінің уақытын күтеді. Нұрымжан көп уақыт бойы командада екінші қақпашы міндетін атқарды. Енді мүмкіндігі туған сәтте өзін жақсы қырынан таныта білді. Биыл көп ойында «Қайсардың» жеңісіне немесе тең түсуіне үлесін қосты. Қарсыластың көп соққысына тосқауыл болды. Дәл осындай сенімді ойын көрсете білсе, алдағы уақытта ұлттық құрамаға шақыру алуы мүмкін» деген пікірін білдірді.
Сондай-ақ жартылай қорғаушы Өркен Махан да былтыр негізінен қосалқы құрамда болды. Бас бапкер Виктор Кумыков биыл оны алғашқы минуттан алаңға шығарып, үлкен сенім артып жүр. Ол командадағы әріптестерінің гол соғуына мүмкіндік жасап, нәтижелі пас шығарып берді.
«Қайсарда» бірнеше жылдан бері капитан міндетін атқарып жүрген Думан Нәрзілдаевтан қазір жастар көп нәрсе үйрене алады. Қызылорда футболының түлегі ұзақ жылдан бері ел біріншілігінде тәп-тәуір нәтижесімен көзге түсіп үлгерді. Ұлттық құрама жейдесін киіп, бірнеше халықаралық ойындарға қатысты. Еліміздің «Ордабасы», «Каспий» секілді бірнеше клубында тәжірибесін жетілдірді. Ендігі кезекте өз клубының жетістігіне үлкен үлес қосып жүр.
Биыл жастар сапынан жартылай қорғаушы Саят Бақтыбай, Бекзат Құрманбекұлы, Дінмұхамед Рүстемұлы секілді жастар жасыл алаң төрінде көбірек көріне бастады. Жас екеніне қарамастан олардың тәжірибелі қарсыласпен терезесі тең деңгейде ойын көрсетіп жүргені қуантады. Олардың болашағы алда деген ойдамыз.
Оған қоса командада Елжас Алтынбеков, Абылайхан Төлегенов, Нұрдәулет Әмірбек, Бауыржан Мағжан секілді қызылордалық футболшылар бар.
Әділжан ҮМБЕТ,
«Сыр бойы»
