Қызылордалық «Қайсар» сырт алаңда «Атырауды» 2:1 есебімен жеңіп, турнир кестесіндегі жағдайын жақсарта түсті. Қазақстандық футболшылардан жасақталған команда осылайша легионерсіз нәтижеге қол жеткізу мүмкіндігі барын тағы бір мәрте дәлелдеп отыр. Олар өткен турда өз алаңында Түркістанның «Тұранын» (1:0) сүріндірген еді.
Рас, жерлестеріміз тоғыз тур бойы жеңіске жете алған жоқ. Төртеуінде тең түссе, бесеуінде қарсыласына есе жіберді. Десе де өз алаңында «Қайрат» және «Астанамен» тең түсуін жанкүйерлер жоғары бағалады. Енді команда өз ойын өрнегін тауып, үш ұпайға қол жеткізе бастады.
«Атырау» командасының биыл жолы болар емес. Қазірге дейін 12 кездесудің небәрі 1-інде жеңіске жетсе, 1-інде тең түсіп, қалғанында қарсыласының ығына жығылды. Сондықтан атыраулық футболшылар «Қайсармен» кездесуінде жанкүйерді қуантатын нәтижеге қол жеткізуге тырысатыны белгілі болатын.
Бірінші кезеңде командалар бір-бірінің қақпа маңында жиі шабуыл ұйымдастырды. Соған қарамастан таблодағы есепке өзгеріс енген жоқ. Екінші кезеңнің 75-минутында «Қайсар» шабуылшысы Айбар Жақсылықовты атыраулық қорғаушылар айып алаңында шалып жықты. Төреші белгілеген пенальтиді Айбардың өзі мүлтіксіз орындады.
Ал 95-минутта «Атырау» ойыншысы Ринат Жұматов таразы басын теңестірсе, 96-минутта қызылордалық клубтан Айбол Әбікен жеңіс голын соқты.
Бұл жеңістен кейін «Қайсар» турнир кестесінде 10 ұпаймен оныншы орынға көтерілді. Енді жерлестеріміз алдағы ойынын 31 мамырда өз алаңында Талдықорғанның «Жетісу» командасына қарсы өткізеді.
Димаш ТАЛҒАТҰЛЫ,
студент
