«Қайсар» футбол клубын алдағы жылы қазақстандық Андрей Ферапонтов жаттықтырады. Тәжірибелі маман Премьер-лигада өзіндік қолтаңбасын қалдырған.
Ол бас бапкер лауазымын «Мақтаарал» футбол клубында бастап, «Оқжетпес» командасында жалғастырды. Сондай-ақ «Ақтөбе», «Ордабасы», «Қайрат», беларустік «Рух» командаларының бапкерлік штабында еңбек етті. Құрама деңгейінде де тәжірибесі жеткілікті. Бүгінде Қазақстан жастар құрамасының бас бапкері міндетін атқарады.
Кейінгі үш жылда қызылордалық клубта бас бапкер болған Виктор Кумыковтың келісімшарты аяқталуына байланысты қызметінен кетті. Ол қызылордалық клубта 2023 жылдан бері жұмыс жасап келді. 2023 жылы 6, 2024 жылы 8, 2025 жылы 11-орын алды. Одан бұрын командада 2003-2004 жылдары да қызмет атқарған еді. Тәжірибелі бапкер «Спартак» Нальчик (Ресей), «Елімай» (Қазақстан), «Машал» (Өзбекстан), «Насаф» (Өзбекстан), «Шахтер» (Қазақстан), «Ордабасы» (Қазақстан), «Алмалык» (Өзбекстан), «Атырау» (Қазақстан) командаларында бас жаттықтырушы болған.
«СБ» ақпарат
