Наурызнама онкүндігінде белгіленгендей, алдағы 15 наурыз – Қайырымдылық күні. Иә, қоғамда әрқашан мейірімділік пен жанашырлық болса, ел ішінде бауырмалдық, туысқандық іргесі сөгілмес. Бұл күні татулық артып, көшпелі ата-бабадан келе жатқан қол ұшын беру үрдісі тағы бір жандана түсетіндей.
Игілікті істі насихаттауға осы күн бекер арналмады. Ел ішінде мазмұнды дәстүрді тереңдете беру қайырымдылық мәдениетін қалыптастыруға ықпал ете беретіні сөзсіз. Сондықтан осы күні жомарт жандардан бөлек, бүкілхалықтық түрлі қолдау шаралары ұйымдастырылады. Кәсіпкерлер мен еріктілер қарттар мен балалар үйін, сондай-ақ көпбалалы отбасыларды құттықтап, дағдарыс орталықтарына арнайылап барады.
– Жылдағы дәстүрмен тұрмысы төмен отбасыларға азық-түлік, дәрі-дәрмек, басқа да қажеттіліктерін табуға көмек көрсетеміз. Қасиетті Рамазан айымен қатар келген Наурыз мерекесі, оның ішінде Қайырымдылық күні біздің еріктілер қаладағы оқу орындарымен, мектептермен бірлесіп, жұмыс атқаруда. Аталған ұжымдармен бірге қайырымдылық қоржынын жинап, оның алды үлестіріліп те жатыр. Сонымен қатар, жеке кәсіпкерлер бастамасымен көп игі жұмыс атқарылуда, – дейді облыстық волонтерлер фронт-офисінің жетекшісі Болатбек Айтбенбетов.
Атаулы күні әр ауданда да мазмұнды шаралар қолға алынған. Мемлекеттік мекемелердің бастамасымен мұқтаждарды қолдау, көмек беру ісі көбейді. Айталық, Наурызнама онкүндігі қарсаңында Арал ауданы мемлекеттік мекемелері және жергілікті мәслихат депутаттары тұрмысы төмен, мүмкіндігі шектеулі жандарға қайырымдылық көрсетуден шет қалмады.
– Жыл сайын Әз Наурыз мерекесі қарсаңында «Наурыз шапағаты» қайырымдылық шарасы өткізіліп келеді. Осы арқылы халықтың әлжуаз топтарына, тұрмысы төмен көпбалалы отбасыларға, мүгедектер мен жалғызбасты қарт кісілерге, жетім және қамқоршысынан айырылған балаларға қайырымдылық көмек көрсетілуде. Азық-түлік себеттерін тарату жұмыстары басталып кетті. Сондай-ақ есепте тұрған жалғызбасты 113 қарттың үй ауласы тазаланып, Көрісу күніне орай қарияларды құттықтау жоспарланып отыр, – дейді аудандық жұмыспен қамту және әлеуметтік бағдарламалар бөлімінің басшысы Ғалия Тоғысова.
Бұдан басқа, аймақтағы кейбір білім ордаларында ұжым ауызбірлігін арттыру, мейірімділік пен айналасына жанашырлықпен қарауға тәрбиелеу мақсатында «Шын жүректен» атты қайырымдылық акциясы да ұйымдастырылған.
Айта кетейік, Қайырымдылық күні Қызылорда қаласы мен аудан орталығындағы қоғамдық көліктер халыққа тегін қызмет көрсетеді. «Қызылорда автобус паркі» ЖШС-нің мәліметінше, мұндай шешім тұрғындарға қолайлы жағдай туғызу үшін ойластырылған.
Ержан ҚОЖАС,
«Сыр бойы»
