Қызылордада кәсіпкерлік ортаға әсер ететін өзекті мәселелердің бірі – санитарлық талаптардың қатаңдығы мен олардың бизнеске түсіретін салмағы талқыға түсті. Кеңес отырысында шағын және орта бизнес өкілдерінің қызметін шектейтін нормалар жан-жақты қаралды.
Негізгі назар Денсаулық сақтау министрінің бұйрығымен бекітілген санитариялық қағидаларға аударылды. Атап айтқанда, адамның өмір сүру ортасы мен денсаулығына әсер ететін нысандар үшін белгіленген санитариялық қорғаныш аймақтарының талаптары кәсіпкерлер үшін қаншалықты тиімді екені қайта зерделенді.
Мамандардың айтуынша, қолданыстағы ережелер кәсіпорындардың қуаты мен технологиялық ерекшеліктерін ескермей, барлығына бірдей талап қояды. Мысалы, V қауіптілік класына жататын нысандар үшін тұрғын үйлерден кемінде 50 метр санитариялық қорғаныш аймағын сақтау міндеттелген. Алайда бұл талап шағын өндіріс орындары үшін шамадан тыс жүктеме болып отыр. Соның салдарынан кәсіпкерлер шағын өндіріс орындарын орналастыруда инфрақұрылым мен логистикаға қатысты қосымша шығынға ұшырап отыр.
Кеңес мүшелері мұндай бірыңғай нормалар қайта өңдеу кәсіпорындарының дамуына кедергі келтіретінін атап өтті. Өндіріс көлемі аз болса да, кәсіпкерлер ірі кәсіпорындарға қойылатын талаптармен теңестіріліп отыр. Соның салдарынан өндірістік нысандарды орналастыру кезінде қосымша инфрақұрылымдық және логистикалық шығындар көбейіп, бизнес ашу мен жүргізу қиындай түседі.
Сарапшылар бұл мәселені шешу үшін тәуекелге негізделген және икемді тәсіл қажет екенін алға тартты, яғни кәсіпорынның нақты қуаты, технологиясы мен қоршаған ортаға әсері ескеріліп, санитариялық қорғаныш аймақтарының көлемі соған сәйкес белгіленуі тиіс.
Отырыс қорытындысы бойынша кеңес мүшелері қолданыстағы санитариялық қағидаларды жетілдіру жөнінде нақты ұсыныстар әзірледі. Бұл ұсыныстарда шағын қуатты объектілер үшін талаптарды жеңілдету және оларды сараланған түрде қолдану мәселелері қамтылған.
Дайындалған бастамалар алдағы уақытта республикалық деңгейде қаралуы үшін Бәсекелестікті қорғау және дамыту агенттігіне жолданбақ. Ұсыныстар қолдау тапса, бұл өңірдегі ғана емес, жалпы елдегі шағын және орта бизнестің дамуына жаңа серпін беруі мүмкін.
Бағлан АЙҒАЛИҰЛЫ
