Мектепте соңғы қоңырау соғылды. Кезекті оқу жылы аяқталып, жыл қорытындысы сараланды. Бітіруші түлектер жаңа өмірге қанат қақты. Биыл білім саласы үшін табысты жыл болды. Өңірде білім сапасын арттыру және оқушыларға жайлы әрі қауіпсіз орта қалыптастыру бағытында ауқымды жұмыстар атқарылды. Заман талабына сай білім ошақтары мен ұйымдары ел игілігіне берілді.
Аймақта биылғы оқу жылын 184924 оқушы, оның ішінде бастауышты 16821 бала аяқтады. «Алтын белгіге» үміткер 805 оқушы бар. Ұлттық бірыңғай тестілеудің шешуші кезеңі 16 мамыр мен 4 шілде аралығында қала, барлық аудандағы тестілеу орталығында өтеді. Тестілеуге оқушылардың 89,5 пайызы қатысады. Бұл туралы облыстық білім басқармасының басшысы Асқарбек Есжанов брифингте айтқан болатын.
Күні кеше барлық сыныпта «Білімім – Отаныма» атты бірыңғай сынып сағаты өткізілді. Осы күні 11-сыныптарға арналған мектеп бітіру рәсімі «Мектебім, саған мың алғыс!» тақырыбымен облыс көлемінде бір мезетте өтті. Ал 18 маусым күні «Жолың болсын, жас түлек!» тақырыбында аттестатты салтанатты табыстау рәсімі ұйымдастырылады. Қорытынды бітіру емтиханы 9-сыныптағы 16306 білім алушы үшін 29 мамыр мен 10 маусым, 11-сыныптағы 9531 бітірушінің мемлекеттік емтиханы 30 мамыр мен 16 маусымда өтеді.
Білім басқармасы тарапынан арнайы бұйрық шығарылып, барлық білім беру ұйымының басшылары мектеп бітіруші түлектердің ата-аналарымен түсіндірме жұмыстарын жүргізді. Басқарма басшысы мерекелік дастарқан ұйымдастыруға, жалға берілетін көлік алып, қала сыртында экскурсия өткізуге, сынып жетекшілеріне сыйлық беру сынды әрекеттерге жол берілмейтінін, бақылау қатаң болатынын жеткізді.
Облыста 2024-2025 оқу жылында 28 колледжде 20341 студент білім алып, 5481 студент оқуын аяқтауда. 45 жоғары сынып оқушысы аттестатпен қатар жұмысшы біліктілігі бойынша диплом алды. Кәсіпорындардың тапсырысы бойынша 121 студент бітіреді. «Жұмысшы мамандықтар жылы» аясында 26 кәсіпорын тарапынан 17 колледжге шефтік көмек көрсетіледі. Сондай-ақ 16 мың оқушы кәсіптік бағдар шарасымен қамтылды. Нәтижесінде жыл сайын колледж түлектерінің жұмысқа орналасу көрсеткіші өсуде. Былтыр 5895 түлектің 4951-і жұмысқа орналасқан. Тағы бір айта кетерлігі, «Жұмысшы мамандықтар жылы» аясында колледждерді үздік бітіруші 200 студентке тұрақты жұмысқа орналасу үшін арнайы жолдама беріледі. Бұл бағыттағы жұмыстар әлі де жүйелі ұйымдастырылуда.
Жалпы білім саласында қарқын бар. Былтыр білім беру инфрақұрылымын қолдау қоры, жергілікті бюджет және жеке инвестор есебінен 17 білім беру ұйымының құрылысы жүргізілді. Бүгінде 960 орындық 6 мектеп, 5 қосымша ғимарат пайдалануға берілді. Президент бастамасымен қолға алынған «Жайлы мектеп» ұлттық жобасы аясында 10 мектептің құрылысы жүргізілуде. Оның ішінде 6 мектеп пайдалануға берілсе, жыл соңына дейін 4 мектептің құрылысы аяқталмақ. «ҚазГермұнай» компаниясының демеушілігімен қалада заманауи үлгідегі «Оқушылар сарайы», облыстық бюджеттен Жаңақорған ауданынан «Оқушылар үйі» мен «Өнер мектебі» ел игілігіне берілді.
Жақын күндері дарынды балаларға арналған 400 орындық облыстық физика-математика бағытындағы «Білім-инновация» лицей-интернаты ашылмақ. Жатақханасы – 300 орын. «Саутс Ойл» компаниясы демеушілігімен музыкалық колледж салынуда.
Жаңа оқу жылының 7,8-сыныбына еліміздің 17 аймағынан 1445 оқушы «Білім-инновация» халықаралық қоғамдық қоры өткізген іріктеу конкурсына қатысып, 200 бала қабылданды.
Заман талабына сай «Сыр жұлдыздары» балалар мен жасөспірімдерге арналған шығармашылық-инновациялық академиясы ашылып, үйірмеге балалар жазылуда.
Шиеліде «Оқушылар үйі» мен «Өнер мектебі» салынуда. Бұдан бөлек «Білім беру инфрақұрылымын қолдау қоры» есебінен Арал ауданы «Жалаңаш» елді мекеніндегі 150 орындық мектеп құрылысын салу жобасы бойынша сатып алу жұмысы жүргізілуде. «Қазақстан халқына» қоры есебінен қаладан 300 орындық жазғы тынығу лагері салынбақ.
Аймақ басшысының тапсырмасына сәйкес күрделі жөндеуден өтетін мектептердің материалдық-техникалық базасы да жаңартылуда. Былтыр 8 мектеп ғимаратына күрделі жөндеу жұмыстары жүргізілсе, биыл 9 мектеп күрделі жөндеуден өтеді. Бұл жұмыстар жыл сайын жалғасады.
Білім саласының жетістіктері де аз емес. Оқушылар мен ұстаздар халықаралық, республикалық сайыстарда, ғылыми жобалар мен олимпиадаларда топ жарып, жоғары деңгейден түспей келеді.
Бүгінде балалардың жазғы демалысын үйлестіру бағытында нақты жұмыстар басталып кетті. Жазғы демалыс кезінде 1-10 сыныпты аяқтайтын 175616 оқушының 98 пайызының уақытын тиімді ұйымдастыру жоспарлануда. Оның ішінде мектеп жанындағы 556 тынығу лагерінде 159614 оқушы демалады. Сонымен қатар 95 мектеп жанында киіз үйлі этнолагерь, 43 шатырлы лагерь жұмыс істеп, оған 6050 бала қамтылады. Қала сыртында орналасқан 8 лагерь мен орталықтарда 7 ауысымда 7153 бала демалады.
Қазіргі таңда басқармаға қарасты жазғы тынығу лагерьлерінде жөндеу жұмыстары аяқталып, материалдық-техникалық жабдықтары жаңартылды. Лагерьлер облыстық санитарлық-эпидемиологиялық бақылау департаментінің қорытынды актісін алды. Бұдан бөлек, «Қазақстан халқына» қорының демеушілігімен Түркістан облысы, Төле би ауданы, «Біркөлік» елді мекеніндегі «Қуаныш» лагеріне 500, жергілікті демеушілер мен кәсіподақтар есебінен 4583 оқушы өзге аймақтарда тынығады. «Балдәурен» републикалық оқу-сауықтыру орталығына 224 оқушы барады. «Сыр жұлдыздары» балалар мен жасөспірімдерге арналған шығармашылық-инновациялық академиясы, «Оқушылар сарайы» сынды облыстағы қосымша білім беру ұйымдарында да үйірмелер жұмыс істейді. Онда оқушылар заман талабына сай инженерлік бағыттағы «Робототехника», «Жасанды интеллект», «Ақпараттық технология», «Дрон және бағдарламалау» секілді үйірмеге қатысады. Балалардың демалыс уақытын тиімді өткізу мақсатында түрі сайыстар да ұйымдастырылатын болады. Сондай-ақ оқушылар еліміздің басқа қалаларына, Сыр өңірінің тарихи орындарына, «Байқоңыр» ғарыш айлағы, Жанкент, Сауран, Сығанақ қалашықтары мен Түркістан облысының киелі жерлеріне, Қорқыт ата ескерткішіне экскурсия, арнайы турлар ұйымдастырып, музейлерге саяхаттайды.
Балалардың жаз мезгіліндегі қауіпсіздігі де басты назарда. Суға түсу маусымына байланысты арнайы жоспар бекітілді. 12 мамырдан бастап барлық білім беру ұйымында «Мамыр қаупі» акциясы, сабақтар өтуде. Осыған орай облыстағы 8 жазғы тынығу лагеріндегі бассейндер мен су айдындарында 7153 балаға жүзу тәсілі үйретіледі.
Ал жаңа оқу жылына дайындық жоспарға сай жүретін болады.
Сара АДАЙБАЕВА,
«Сыр бойы»
