Қыс мезгілі таяған сайын тұрғындар үшін ең бастысы – үйлерінде жылу мен жайлылықтың болуы. Сондықтан өңірде газбен үздіксіз әрі қауіпсіз қамтамасыз ету мәселесі әрдайым бірінші орында тұрады.
Осыған орай облыстық коммуникациялар қызметінің ұйымдастыруымен өткен пресс-тур барысында бұқаралық ақпарат құралдарының өкілдері «QazaqGaz Aimaq» АҚ Қызылорда филиалына қарасты бірнеше газ тарату пункттерін аралап, олардың жұмысымен танысты. Журналистер нысандарда болып, мамандардың атқарып жатқан қызметін көрді және көкейіндегі сұрақтарға жауап алды.
Филиал өкілдері газ құбырларының техникалық жағдайы, атқарылып жатқан жөндеу шаралары мен қауіпсіздік талаптары жайлы баяндап берді. Мамандардың айтуынша, облыста бүгінде шамамен 148 мың абонент табиғи газға қосылған. Бұл көрсеткіш жыл сайын артып келеді. Газдандыру халықтың тұрмыс деңгейін жақсартып қана қоймай, өңір экономикасының дамуына да ықпал етуде. Қызылорда филиалының теңгерімінде төрт жарым мың шақырымға жуық газ құбырлары бар.
Филиал директорының міндетін атқарушы Бауыржан Әбдіғаппарұлының айтуы бойынша, қысқы маусымға дайындық биыл көктемде, сәуірдің ортасында басталған. Қажетті жұмыстардың барлығы тамыз айының соңына дейін аяқталады. Құбырлар мен газ реттеу пункттері тексеріліп, ақаулар түзетілді. Мамандар арнайы оқу-жаттығулардан өтіп, кез келген жағдайға дайын.
Қысқа толық дайындықты қамтамасыз ету мақсатында арнайы дайындық паспорты жасалып, ол облыстық энергетика және тұрғын үй-коммуналдық шаруашылық басқармасымен келісілген. Шара аясында оқу-жаттығулар ұйымдастырылып, шкафтық және газ реттеу пункттері жөнделді, жабдықтарға техникалық қызмет көрсетілді, катодтық қорғаныс жүйелері тексерілді.
‒ Алайда бір мәселе жұмыс барысына кедергі келтіруде. Ол – халықтың қарызы. Облыс бойынша тұрғындардың газ үшін берешегі 1 миллиард теңгеден асады, ‒ дейді Б. Әбдіғаппарұлы. – Оның ішінде 700 миллионнан астамы жеке үйлердің үлесінде. Заңға сәйкес қыс мезгілінде газды өшіруге тыйым салынғандықтан, борышкерлерге қатысты шаралар жаз-күз айларында жүргізіледі. Осы кезеңде қарызы бар абоненттердің үйлеріне газ беру уақытша тоқтатылады. Тек берешегін толық өтегеннен кейін ғана оларға «көгілдір отын» қайта қосылады.
«QazaqGaz Aimaq» АҚ филиалы мамандары бүгінде алдағы жылу маусымына толық дайын екенін айтып отыр. Баспасөз турға қатысқан журналистер де жүргізілген жұмыстардың ауқымына көз жеткізіп, тұрғындардың үйінде жылу мен жарықтың үздіксіз болуы үшін күнделікті еңбек етіп жүрген сала қызметкерлерінің еңбегін жоғары бағалады.
Б.АЙҒАЛИҰЛЫ
