Мемлекет басшысы Қасым-Жомарт Тоқаев Ғылым күні қарсаңында ғалымдармен кездесіп, кәсіби мерекемен құттықтады. Жиында ғылымның әр саласында табысты еңбек етіп, мемлекетіміздің дамуына айрықша үлес қосқан бірқатар ғалымға мемлекеттік наградалар табыс етілді. Солардың қатарында жерлесіміз, Қорқыт ата атындағы Қызылорда университетінің су шаруашылығы және жерге орналастыру білім беру бағдарламасының профессоры, техника ғылымдарының докторы Серікбай Қошқаров «Парасат» орденімен наградталды.
Серікбай Қошқаров 1945 жылы Сырдария ауданында дүниеге келген. Ол 1959-1963 жылдары Қызылорда гидромелиоративтік техникумында білім алып, кейін Жамбыл гидромелиорация-құрылыс институтын «Гидромелиорация» мамандығы бойынша бітірді. 1968-1969 жылдары Тасбөгет қыстағында күріш суармалы жүйесі құрылысында мастер қызметін атқарды. Одан кейін сегіз жылдай Қазақ күріш ғылыми-зерттеу институтында аға ғылыми қызметкер, зертхана меңгерушісі болып жұмыс істеді.
1978 жылы Мәскеу гидромелиорация институтында техника ғылымдарының кандидаты ғылыми дәрежесін, 1997 жылы Мәскеу мемлекеттік табиғатты үйлестіру университетінде докторлық диссертациясын сәтті қорғады. Мұнан кейін Жамбыл гидромелиорация-құрылыс институтының Қызылорда филиалында кафедра меңгерушісі, кейін екі жоғары оқу орны біріккен соң, Қорқыт ата атындағы Қызылорда университетінің қалыптасуына үлес қосты.
Бүгінде ғалым-ұстаздың 2 монографиясы, 3 оқу құралы, 2 әдістемелік нұсқаулығы және 150-ден астам ғылыми мақаласы жарық көрді. Оның ғылыми жетістіктері мен тәжірибесі еліміздің су шаруашылығы, экология және аграрлық ғылым саласының дамуына айтарлықтай үлес қосуда.
Ол табысты еңбек жолында өзіне лайықты бағасын алып келеді. Ерен еңбегі үшін ҚР Білім және ғылым министрлігінің «Қазақстан Республикасының Білім беру үздігі» төсбелгісімен, «Қазақстан Республикасының Тәуелсіздігіне 10 жыл» мерейтойлық медалімен, «Құрмет» орденімен, «Қазақстан Республикасының ғылымын дамытуға сіңірген еңбегі үшін» медалімен, “Қазақстан Республикасының Білім беру ісінің құрметті қызметкері” атағымен және Ахмет Байтұрсынов төсбелгісімен марапатталған.
Ол – елімізге, облысымызға белгілі су шаруашылығының жоғары білікті маманы. Сыр бойының су мәселесі бойынша ғылыми бағытта ұзақ уақыт ізденіс жүргізіп, зерттеу жұмыстарымен айналысты.
Сара АДАЙБАЕВА,
«Сыр бойы»
>>> Біздің Facebook, Instagram парақшаларымыз бен Telegram каналымызға жазылыңыз! <<<
