Қаракеткен ауылындағы №114 орта мектепте ардагер-ұстаз Мәлік Меңбаевтың туғанына 100 жыл толуына орай бастауыш сынып кабинеті ашылды. Ауылдағы алтын ұяда өмірінің соңына дейін еңбек еткен ұстаз есімі ұлықталып, «Шәкірт жүрегінде мәңгі сақталған есім» атты салтанатты жиын өтті.
Шараға облыстық ардагерлер кеңесі төрағасының орынбасары Өмірбек Шәменов, аудандық ардагерлер кеңесінің төрағасы Садық Әлиев, аудандық мәслихат төрағасы Өмірбек Елеусінов, қаржы саласының ардагері Болат Тәшімбетов пен ұстаздың әріптестері, шәкірттері мен ағайын-туыстары, балалары және мектеп ұжымы қатысты.
Қатысушылар ардагер ұстаздың өмір жолы мен білім саласына сіңірген еңбегін ерекше ықыласпен еске алды.
Мәлік Меңбаев 1925 жылы 13 наурызда Жалағаш ауданы «Қаракеткен» бекеті маңайындағы Шынар көліне таяу Кеңтүбек деген жерде дүниеге келген. Ағасы Аманбай мен апасы Ханшадан кейінгі отбасы мүшесі. Кішкентайынан алғыр болып өскен ол Қалжан ахун медресесінде тәлім алған. Одан кейін Қаракеткен ауылындағы 7 жылдық мектепті жақсы аяқтап, 1947-1950 жылдары әскер қатарында болған. 1951-1956 жылдар аралығында Қызылорда қаласындағы Н.Гоголь атындағы педагогикалық институтты орыс тілі мен әдебиеті пәні мұғалімі мамандығы бойынша білім алған. Әуелі Далдабай ауылындағы №115 орта мектепте, кейін Қаракеткен ауылындағы №114 орта мектебінде зейнеткерлікке шыққанша мұғалім болып жұмыс жасаған.
– Әкеміз бізді бала күнімізден еңбекке баулып, бойымызға адамгершілік, еңбекқорлық сынды асыл қасиеттерді сіңіріп өсірді. Бізге «ешкімнің ала жібін аттамаңдар, не тапсаңдар да адал еңбекпен табыңдар» деп үнемі айтып отыратын. Орыс тілі пәнінің мұғалімі болып, ауыл балаларын білімге баулыды. Оның шәкірт жүрегінен өшпес орын алғанына бүгінгі шараға келген аға-апаларымыз дәлел, – дейді Қуандық Меңбаев.
Аудандық ардагерлер кеңесінің төрағасы Садық Әлиев жаңа сыныптың ашылу құрметіне орай мектеп директорына «Шежірелі Жалағаш» кітабын сыйға тартты. Мұнан кейін бастауыш сыныптың лентасы қиылып, ақсақалдар ақ батасын берді. Ардагер ұстаздың баласы Қуандық Меңбаев кабинетті заманауи құрал-жабдықтармен жабдықтап, оқушылардың сапалы білім алуына қолайлы жағдай жасаған. Сондай-ақ сынып алдында ұстаздың өмірбаяны мен жетістіктерін таныстыратын бұрыш та ұйымдастырылған. Ардагер ұстаз атындағы кабинетте бүгінде 2-сыныптың оқушылары білім алуда. Олар шара барысында Қуандық Меңбаевқа алғыстарын жаудырды.
Мектеп директоры Ерболат Наурызбаев жаңа оқу жылын 224 оқушымен бастағанын айтты. Оның 24-і – мектеп табалдырығын алғаш аттаған бүлдіршіндер. Биыл 9-шы рет бітіруші түлектер ҰБТ-ға 100 пайыз қатысқалы отыр. Былтыр мектеп бітірген 13 түлектің 1-еуі «Алтын белгі», 4-еуі «Үздік аттестатқа» үміткер атанған.
– ҰБТ қорытындысы бойынша ауданда алғашқы үштіктің қатарындамыз. Шүкір, түлектеріміздің барлығы жыл сайын мемлекеттік грант иегері атануда. Бұл үрдіс жалғасады деп сенеміз, – дейді мектеп директоры.
Іс-шара барысында ардагер ұстаз Мәлік Меңбаевті еске алуға арналған оқушылар арасында шағын футболдан аймақтық турнир өтті.
«СБ» ақпарат
