Майданда ерлікпен қаза тапқан жауынгерлердің бірі – Әлменов Әбдіқалық Ыбырайұлы.
Ол 1923 жылы қазіргі Сырдария ауданы Асқар Тоқмағамбетов ауылында дүниеге келген. 1940 жылы Қызылордадағы педагогикалық училищені бітіріп, еңбек жолын Жалағаш ауданы «Аламесек» ауылындағы 1 Май жетіжылдық мектебінде мұғалім болып бастайды. Жас педагог сол жылдары комсомол мүшесі де болған.
1942 жылдың қаңтарында Қармақшы аудандық әскери комиссариаты арқылы әскер қатарына шақырылып, майданға аттанды. Алдымен Ташкент қаласына екі айлық әскери дайындыққа жіберіліп, сол жерде сержант шенін алады. Тамыз айында майданға жөнелтілді.
Сол жылдың тамызында ата-анасына соңғы хатын жолдапты. Онда: «Майданға аттанып бара жатырмыз, Сталинград шайқасында бөлімше командирімін» деп жазған. Бұл – оның туған-туыстарына жеткен соңғы хабары еді. 1942 жылдың желтоқсанында отбасына «ұрыс даласында қаза тапты» деген қара қағаз келген.
Анасы баласын тірі келеді деп үмітін үзбей, өмірінің соңына дейін жолын тосып өткен. Соңғы хаты мен қара қағазын жастығының астына жастап жатқан деседі. Ал әкесі Ыбырай түсінде үйінің дарбазасының алдына Сталин келіп тұрғанын көріп, бұл бір белгі болар деп, баласының тірі екеніне сеніп өткен.
Інісі Әбілқасым ағасының есімі ұмыт болмасын деп, тұңғышын Әбдіқалық Махмұт Әбдіқалықұлы деп атаған. Бұл өткенге құрмет пен сарытап болған сағыныштың белгісі еді.
Әбдіқалық Ыбырайұлының есімі Асқар Тоқмағамбетов ауылындағы ескерткіш-тақтаға жазылып, «Боздақтар» кітабына енген.
Ол елі мен ұрпақтарының жадында мәңгі сақталып, отансүйгіштігі мен ерлігі ертеңге үлгі болып қала бермек.
Гүлжан ИБРАЕВА,
Ж.Нұрманов атындағы
№198 орта мектептің мұғалімі,
тарих магистрі.
