Шиеліге мемлекет және қоғам қайраткері, жазушы, публицист Алтыншаш Жағанова келді. Аудан әкімдігінде мәртебелі қонақпен кездесу ұйымдастырылды. Алқалы жиынға аудандық мәслихат төрағасы, аудан әкімінің орынбасарлары, «AMANAT» партиясы аудандық филиалының атқарушы хатшысы, мәдениет пен білім саласының өкілдері, ардагер ұстаздар мен жастар және Алтыншаш Қайыржанқызының бірқатар замандасы арнайы келді.
Жиынды жүргізген аудан әкімі Айтбай Жандарбеков мемлекет және қоғам қайраткері Алтыншаш Жағанованың қарымды қаламгерлігімен қатар Тәуелсіздіктің алғашқы жылдарындағы еселі еңбектерін тілге тиек етті.
– Сіз елдің рухани жаңғыруына, әйел әдебі мен ұлттық мәдениеттің дамуына зор еңбек сіңірдіңіз. Шығармаларыңыз және қоғамдық қызметіңіз жас ұрпақ үшін үлкен өнеге. Аудан халқы еңбегіңізді жоғары бағалайды, – деген аудан басшысы мәртебелі мейманға Шиелі ауданының Құрмет грамотасын табыстап, сый-құрмет көрсетті.
Шиелі ауданы әйелдер кеңесінің төрайымы Нәйла Палымбет, ардагер ұстаз Нәзира Парманқұлова және қоғамдық ұйымдар басшылары, тілектес ағайындар өз ықыластарын білдіріп, биыл сексен жасын тойлайтын қайраткерге ұзақ ғұмыр мен шығармашылық шабыт тіледі.
Өз кезегінде қоғам қайраткері Алтыншаш Қайыржанқызы да аудан басшылығы мен құрмет көрсеткен жерлестеріне жылы лебізін білдірді.
– Мен үшін Шиелі ерекше ыстық. Бірнеше шетелде болдым. Қазақстанның екі жүзден астам аудандарын аралап, елмен қауыштым. Алайда, мен үшін ең қымбат адамдар бірқатары осы Шиеліде тұрады. Бүгін шырайлы өлкенің одан сайын жаңарып-жаңғырып жатқанына куә болып отырмын. Ал Сыр өңірінің жаңалықтары мен жаңашылдығына тіптен таңғалудамын. Жасай беріңдер, жаңара беріңдер, – деп ізгі ниетін ерекше ықыласпен жеткізді. Аудан өнерпаздары әуезді әуенмен жұртшылықты серпілтіп, кездесудің сәнін келтірді.
Н.НАЗЫМХАНҰЛЫ.
Шиелі ауданы
