Табиғаттың ажырамас бөлігі болып саналатын құстар зиянкестерді азайтып, экожүйенің тепе-теңдігін сақтауға көмектеседі. Оларға арналған ұя жәшіктерін (скворечник) орнату – оларды қорғаудың тиімді тәсілі. Мұндай жәшіктер әсіресе торғай, қараторғай, шымшық сияқты ұсақ құстар үшін өте пайдалы.
«Таза Қазақстан» акциясы және республикалық «Парктер шеруі-2025» табиғат қорғау акциясы аясында табиғатты қорғау мақсатында өңірде «Құстарға қамқор болайық!» акциясы Жаңақұрылыс елді мекенінде және Арал қаласында ұйымдастырылды. Акцияға «Барсакелмес» қорығының қызметкерлері, Жаңақұрылыс елді мекенінің №74 орта мектебінің, Арал аудандық оқушылар үйінің оқушылары белсенді қатысып, құстарға қолайлы мекен жасауға үлес қосты.
Іс-шара барысында қатысушылар алдын ала дайындалған ұя жәшіктерін ағаштарға орнатты. Қатысушыларға құстарды қорғау, олардың табиғаттағы рөлі және ұя жәшіктерін дұрыс орнату тәсілдері туралы түсіндірме жұмыстары жүргізілді. Сондай-ақ балаларға табиғатты аялау және қоршаған ортаны қорғаудың маңыздылығы айтылды.
«Құстарға қамқор болайық!» акциясы алдағы уақытта да өз жалғасын табады.
Фатима ӘНЕСОВА,
«Барсакелмес» мемлекеттік табиғи қорығының қызметкері
