Қалалық қоғамдық даму бөлімінің ұйымдастыруымен Қызылорданың астана болғанына 100 жыл толуына орай мектеп оқушылары үшін тарихи орындарға танымдық экскурсия ұйымдастырылды.
Оқушылар алдымен ғасырлық тарихы бар теміржолшылар клубының ғимаратында болды. Бұл нысан 1924-1990 жылдары теміржолшылардың мәдени-демалыс және рухани орталығы саналған.
Ал Қызылорда теміржол вокзалы 1905 жылы салынған және әлі күнге дейін өз қызметін атқарып келеді. Вокзал – қаладағы стратегиялық маңызды нысан.
Бұрынғы казарма, қазіргі көркемсурет галереясы XIX ғасырдың соңы мен XX ғасырдың басында әскери мақсатта бой көтерген. Бүгінде ғимарат қылқалам шеберлерінің шығармашылығын дәріптейтін көркемсурет кеңістігіне айналып отыр.
Көне ғимараттардың тарихымен терең танысқан оқушылар құнды мәліметтерге қанықты.
Одан әрі Сырдарияның сол жағалауында орналасқан Қызылорда қаласының тарихи музейіне барды. Қызылорда қаласы астана болған тұста Қазақ Орталық Атқару комитетінің ғимаратында халқымызға «қазақ» атауы ресми түрде қайтарылды. Сол жағалаудағы музей осы тарихи ғимараттың сәулет сызбасы негізінде қайта салынған.
Саяхат барысында Қызылорданың 1925-1929 жылдар аралығында астана болған кезеңі туралы тың деректер ұсынылды. Сол уақыттағы саяси, мәдени және білім беру салаларындағы маңызды оқиғалар, қазақ зиялыларының қызметі туралы мағлұматтар да қамтылды. Сонымен қатар, оқушылар тарихи жәдігерлерді тамашалап, интерактивті экспозициялар арқылы сол кезеңнің атмосферасын сезінді. Музейде орналасқан жәдігерлердің тарихына жеке-жеке тоқталған маман оқушылардың сұрақтарына жауап берді.
«СБ» ақпарат
