Сыр елінің ардагерлері мінген автобус маусым айының 4-ші жұлдызында таң ата Түркістан облысын бетке алып, жолға шықты. Бабалар рухына Құран бағыштап, тарихи жерлерді аралап көреміз деген көңіл-күй ардагерлерді қанаттандырып, автобус ішін жанға жайлы бір әуен тербеп келеді.
Қасиетті Құрбан айт қарсаңында облыстық ардагерлер кеңесінің төрағасы Серік Әбішұлы Дүйсенбаев бастаған Сыр елінің өсіп-өркендеуіне, жас ұрпаққа рухани-тағылым беруде еңбегі сіңген ардагерлердің көрші облыстарға бұл алғашқы сапары емес. Бұған дейін де Ұлытау облысын, қасиетті қазақ жерінің бабалар дүбірге бөлеп өткен кең даласын аралап, тарих көмбесінен сыр шерткен мекендердің сырына үңіліп, қаныққан болатын.
Жол сапары адамдардың бір-бірін жақын тануға, болмыс-бітімін айқындауға мол септігін тигізетіні ақиқат. Әр саланың тізгінін ұстаған 50 ардагер жарқын жүзбен шүйіркелесіп, әңгімелері бір арнаға тоғысып келеді. Ол – Түркістан облысы Отырар ауданының жерінде мәңгілік мекен тапқан – Арыстанбаб әулиенің басына құрбандық шалып, Құран бағыштап, бабаның рухани әлеміне бойлау.
Жолаушының мақсаты діттеген жерге жету болса, ардагерлерді Түркістан қаласынан облыстық ардагерлер кеңесінің төрағасы Жеңісбек Мәуленқұлов күтіп алып, Отырар ауданына қарай жол бастады.
Қашан да келіп-кетуші көпшілік арылмайтын Арыстанбаб әулие кесенесінің алдындағы арнайы орынға құрбандық малын шалып, баба рухына Құран бағышталды.
Отырар аудандық ардагерлер кеңесінің төрағасы Арзықұл Бектібай, аудан әкімшілігінің қызметкерлері Сыр елінен келген ардагерлерге қонақжайлық көрсетіп, ыстық ықыласқа бөлендік. Отырар музейі көненің көзіндей жәдігерлермен қайта табыстырғандай рухани мол тағлым алдық.
Түркістан шаһары жасарып, жаңарып, сұлу да әсем қалаға айналыпты. Салынған, енді салынып жатқан ғимараттар көз тартып, оның үстіне күтіп алып, қызмет көрсеткен түркістандықтардың қонақжайлығы екі облыс ардагерлерін рухани жақындатып, көңіл толқытты. Қ.А.Яссауи бабамызға Құран бағыштап, қаланы аралауға шықтық. Электро кармен кесене маңын аралатып, «Визит» орталығында Қ.А.Яссауи кесенесінің шығыс, батыс бөлігіндегі өрнектеліп жазылған қасиетті сөздердің мән-мағынасы түсіндірілді. Көне есік, түрлі жәдігерлер таныстырылды. Онан кейін «Ұлы дала елі» орталығын тамашалаған соң, «Алтын самұрық» 8Д әуе театрына кіріп, 50 ардагер теңдесі жоқ ғажайып көріністердің куәсі болды. «Жасанды көл», «Жастар» саябағы Түркістан қаласының жасыл желекке бөленген, экологиясы таза, жанға жайлы мекен екенін дәлелдей түскендей болды. Рухани, мәдени орталықтарды аралап, көзбен көріп, көңілге түйген ардагерлер жансарайы ашылып, бір серпіліп қалды. Бір күндік сапар жылға татырлық рухани азық сыйлады. Бір айта кететіні, Түркістан қаласының әкімі Әзімбек Пазылбекұлы Сыр елінің ардагерлерімен жүздесіп, дәм-тұзын ұсынып, қазақтың салт-дәстүрін берік ұстанған азамат екенін көрсете білді. Түркістан облысына зиярат жасап барған ардагерлеріміз рухани кемелденіп, елге аман-есен, соны серпіліспен оралды.
Осындай рухани тазалықтан нәр алып қайтуға бастамашы болып, ұйымдастырған облыстық ардагерлер кеңесінің төрағасы Серік Дүйсенбаевқа, орынбасары Мақсұт Баекеевке, сапарлас болған қалалық мәдениет саласының қызметкерлеріне ардагерлер алғысы шексіз.
Қаршыға ЕСІМСЕЙІТОВА,
Халықаралық «Алаш» әдеби сыйлығының иегері,
Қазақстан Жазушылар одағының облыстағы өкілі
