Көктем – табиғаттың ғана емес, адамның да жаңаратын шағы. Қар еріп, жер бусанып, айнала тіршілікке толған кезде қоғам да қозғалысқа келеді. Қазақ үшін Наурыз – жай ғана жыл басы емес, өмірге жаңаша қарауға, өткенді саралап, алға нақты қадам жасауға мүмкіндік беретін кезең. Осы мазмұнды тереңдете түскен Наурызнама онкүндігінің ішінде 23 наурыз – Тазару күні ерекше мәнге ие. Бұл тек аула тазалау немесе сенбілік өткізу күні емес. Бұл – адамның өз өміріне, қоршаған ортасына деген көзқарасын қайта қарауға шақыратын күн.
Биыл да Қызылордада Тазару күніне орай ауқымды жұмыстар қолға алынады. Қала көшелері мен аулалар ретке келтіріліп, арықтар тазаланады, жаңа ағаштар отырғызу жоспарда бар. Әсіресе жастар ұйымдары мен еріктілердің белсенділігі көзге түседі. Олар туған жердің келбетін жақсартуға нақты іспен үлес қосып жүр. Қалдықтарды сұрыптау, көгалдандыру секілді бастамалар бүгінде бір реттік акция емес, тұрақты әдетке айнала бастаған.
Бұл бағыттағы жұмыстардың маңызын «Қызылорда тазалығы» КМК директоры Сапарғали Асылбеков те атап өтті.
– Тазару күні – жай ғана сенбілік емес. Бұл – әр адамның табиғатқа деген көзқарасын көрсететін күн. Қаланы таза ұстау – тек коммуналдық қызметтің емес, баршамыздың ортақ міндетіміз. Осындай күндері тұрғындардың белсенділігі артып, әркім өз үлесін қосуға тырысады. Әр отырғызылған ағаш, әр жиналған қоқыс – болашаққа жасалған нақты инвестиция, – дейді ол.
Қызылорда қаласының тұрғын үй-коммуналдық шаруашылығы, жолаушылар көлігі және автомобиль жолдары бөлімі ұсынған мәліметке сәйкес, жыл басынан бері шаһардан 13 мың тоннаға жуық қоқыс шығарылған. Қаланың тазалығын қамтамасыз ету жолында күн сайын таңмен таласа еңбекке кірісетін коммуналдық қызметкерлердің еңбегі айрықша. Олар күнделікті 30-40 көшені тазалап, шаһардың қалыпты тіршілігінің үздіксіз жүруіне үлес қосуда. Осындай жүйелі жұмыстар алдағы экологиялық бастамалармен өз жалғасын табады.
23 наурызда елімізде «Мөлдір бұлақ» республикалық акциясы бастау алады. Игі шара аясында бұлақ көздерін аршу, өзен-көл жағалауларын тазарту жұмыстары жүргізіліп, 700-ден астам әлеуетті су нысанын түгендеу жоспарланып отыр. Бұл бастама – табиғатты аялауға бағытталған нақты қадам ғана емес, қоғамды ортақ жауапкершілікке үндейтін маңызды іс.
Тазару күні – тек сыртқы ортаны ретке келтіру емес, адамның ішкі әлеміне үңіліп, артық жүктен арылатын ерекше кезең. Күнделікті күйбең тіршілікте жиналған реніш пен ауыр ойлардан арылып, жаңа мақсаттарға бет бұру – осы күннің басты мәні. Осылайша, Тазару күні Наурызнама онкүндігінің қорытынды нүктесі ретінде жаңару мен тазалықтың символына айналады.
Бағлан АМАНЖОЛ,
«Сыр бойы»
