Адам өмірінде ұлттық құндылық дамудың алдыңғы сатысында тұруы керек. Ұлттық құндылығы сақталмаған ұрпақтың келешегі кемел болады деу бекер сөз. Бүкіл ақпарат ғаламторға жүктелгендіктен ой түю, іздену деген ұғым тысқарылап бара жатқандай. Бүгінгі жас ұрпақ оқып ізденгеннен гөрі ғаламтор көмегіне жүгінгенді жөн санайды. Осы тұста келешек ұрпақтың ой-өрісі тоқырауға түспей ме деген күмәнді ой санадан сығалап тұрады. Қоғамда болып жатқан дүниенің жақсысы бар, жаманы бар. Әркім керегінше ала отырып, өзіне ой түйеді. Келешек ұрпақтың санасына ұлттық құндылықтарды сіңірту мақсатында Ғани Мұратбаев мемориалдық музейі «Төрдегі сөз» сырлы сұхбат айдарымен өткен жылдан бері жүйелі жұмыс атқаруда.
Ұлт құндылығының мәйегі – халықтың дәстүрі мен салт-санасы. Қазақ халқының көнеден келе жатқан игі дәстүрлерінің бірі – «Төркін сыбаға». Ұзатылған қызға төркінінен берілетін сый – құрмет пен ізеттің белгісі. Осы игі дәстүрдің жалғасы ретінде Ғани Мұратбаев мемориалдық музейі қор сақтаушысы Жұлдыз Ерболқызына әкесі, Шиелі ауданының тұрғыны Ербол Балтабеков қараша үйді төркін сыбаға ретінде тарту етті.
Музей ұжымы бұл игі бастаманы қолдап, көктемде қараша үйді музей ауласына тігіп, құнды жәдігерлермен толықтыра отырып, ашық аспан астындағы музей ұйымдастырды. Бұл бастама ұлттық мұраны жаңғыртудың нақты көрінісіне айналды. Қазалыға қараша үйді жіберген Ербол Балтабеков ағамызға музей ұжымы атынан алғыс білдіреміз. Көрермендердің көңілінен шыққан бұл жұмысты ұйымдастыру барысында қараша үйде көнекөз қариялармен, шежіреші шешен, сөз зергерлерімен сұхбаттасу шаралары өткізілді. Қадірменді қонақтар өз ойларын бөлісіп, тыңдарманға насихат етті. Атап айтсақ, домбыра жасау шебері Ерболат Қанатбай «Домбыра – халықтың жаны, шебердің жүрегі» атты сұхбат, қолөнер шебері, ақын әрі емші болған Молдахмет Дүйманов пен ұлы Бейсенбайдың өнегелі өмірі жайлы шебердің қызы Мадина Молдахметқызымен «Қарапайым еңбектің қастерлі жолы: әкелі-балалы Дүймановтар жайлы естелік», Ғани Мұратбаевтың шәкірті Жүндібай Баянбаевтың қызы Бақыт Баянбаева әкесінен естіген Ғани Мұратбаев жайлы естеліктерін бөлісіп, көрермендерге тарихтың тірі куәсіндей әсер сыйлады.
Музей жобасының келесі қонағы, Қазалы қаласының белгілі ағаш шебері Толғанбек Оралов болды. Ол өзінің өнерге келу жолы, алғашқы жасаған бұйымдары жайлы, ұлттық қолөнердің тәрбиелік мәні мен құндылығы туралы ой қозғады.
Сондай-ақ Абай ауылының тұрғыны, қолөнер шебері, термеші Мәриямкүл Көптілеумен және 1 қазан – Халықаралық қарттар күніне орай, Қазалы қаласының тұрғыны, еңбек ардагері, термеші Даража Тұрмағанбетқызымен сұхбат жүргізілді. Келушілер музейге экспонаттар сыйға тартып, қордың толығуына үлес қосуда. Бұл – ұлттық құндылықтарды дәріптеудің, өткен мен бүгінді сабақтастырудың жарқын үлгісі.
Ұлттық құндылық – ұлт болашағының берік іргетасы. Жаһандану заманында рухани тамырдан ажырамау, ата дәстүрді ұлықтау – әрбір азаматтың міндеті. «Төрдегі сөз» жобасы арқылы жүзеге асып жатқан игі бастамалар ел игілігі үшін алдағы уақытта да жалғасын табары сөзсіз.
Ақзира САРМАНТАЙ,
Ғани Мұратбаев музейінің
ғылыми қызметкері
