1995 жылы Әйтеке би кентінде өмірге келген Алтынбек Қанжарбекұлы Шымкенттегі Халықтар достығы университетін құрылыс мамандығы бойынша тәмамдаса да, оқу орнын бітіріп шыққан соң нағыз ер-азаматтарға тән төтенше жағдайлар қызметіндегі өрт сөндіруші-құтқарушы қызметін таңдады. Бұл таңдауға темір тәртіпке негізделген теміржол саласында еңбек етіп, зейнетке шыққан ата-анасы Қанжарбек Қамбаров пен Дариха Мамбетованың да ықпалы болғаны рас.
Алдымен 2017 жылы Арал аудандық төтенше жағдайлар қызметінің өрт сөндіру бөлімінде бір жылдай тәжірибе жинақтап, 2018 жылы Қазалы ауданының төтенше жағдайлар қызметі №9 өрт сөндіру бөліміне өрт сөндіруші-құтқарушы мамандығы бойынша жұмысқа орналасты.
– Адамның өмірі, табан ет маңдай терімен жиған дүние-мүлкінің, сонымен қатар халықтың ортақ қазынасы – мемлекет мүлкінің кез келген төтенше қауіп-қатерден аман болуы басты міндетіміз, – дейді өрт сөндіруші-құтқарушы Алтынбек Қанжарбекұлы. – Әрине, «сақтансаң сақтаймын» деген бар ғой. Ең бірінші кезекте тұрғындардың бейқам болмай, дүние-мүліктерінің, отбасы-балаларының қауіпсіздігіне жауапкершілікпен қарауы өздеріне де, төтенше жағдай қызметіне де өлшеусіз көмек болар еді. Тұрғындардың, төтенше жағдайлар қызметінің бірлесе жұмыс жүргізуі, насихат жұмыстары нәтижесін береді деп ойлаймын.
Өз мамандығының қадір-қасиетін, бағасын, жауапкершілігін жақсы сезінетін Қазалы аудандық төтенше жағдайлар қызметі №9 өрт сөндіру қызметінің өрт сөндіруші-құтқарушысы Алтынбек Қанжарбекұлы өзінің 24 сағаттық жауапты қызметінде ұжымдастарымен бірге қандай да бір төтенше жағдайдың алдын алуға әркез дайын екеніне сенімді.
Әлімжан ҚИЯС.
Қазалы ауданы
