Түркия билігі инфляция жағдайында зейнеткерлердің әл-ауқатын жақсарту және олардың сатып алу қабілетін қолдау үшін 2025 жылдан бастап ең төменгі зейнетақыны көтеру туралы шешім қабылдады, деп хабарлады Syrboyi.kz Қазақпарат агенттігіне сілтеме жасап.
Түркияда жаңа жылдың басынан бастап ең төменгі зейнетақы алатын 16 миллионнан астам зейнеткердің зейнетақысы өсті.
Елдің Еңбек және халықты әлеуметтік қорғау министрі Ведат Ишыкхан биыл зейнеткерлер үшін ең төменгі зейнетақы мөлшері 14 469 түрік лирасын (шамамен 202 мың теңге) құрайтынын айтты.
Экономистер зейнетақыны көтеру елдің әлеуметтік саясатындағы маңызды қадам болды, бұл үкіметтің күрделі экономикалық жағдайларға қарамастан халықтың өмір сүру сапасын жақсартуға ұмтылысын көрсететінін айтты.
Ең төменгі зейнетақы мөлшері шамамен 410 долларға сәйкес келеді, бұл Түркияны ұқсас көрсеткіштермен дамушы елдер арасында орта деңгейге қояды.
Алайда, азаматтардың нақты сатып алу қабілеті инфляцияның одан әрі динамикасына және ұлттық валюта бағамына байланысты.
Түркияда 2025 жылға арналған ең төменгі жалақы 22 104 түрік лирасын (шамамен 325 мың теңге) құрайтынын, бұл бұрынғымен салыстырғанда 30 пайызға өсетінін бұған дейін хабарлаған болатынбыз.
Осыған дейін Түркияның орталық банкі ұзақ уақыттан бері алғаш рет пайыздық мөлшерлемелерді төмендеткенін жаздық.
>>> Біздің Facebook, Instagram парақшаларымыз бен Telegram каналымызға жазылыңыз! <<<
