Вирустан қорғанудың бірден-бір тәсілі – қорғаныш бетпердесі. Медициналық маска жұқпалы аурулардан қорғайтынын жақсы білеміз. Ал ол осыдан 100 жыл бұрын «испан тұмауы» кеңінен тараған кезде пайда болған деседі. Дәл осы медициналық бетпердеден тапшылық болған сәтте Шиелі ауданындағы «Тоғжан» тігін ательесі бетперде тігуді қолға алған болатын.
– Біз былтырдан бері аграрлы-техникалық колледжбен әлеуметтік-әріптестік аясында келісімшарт жасаған болатынбыз. Тігінші мамандарды іс-тәжірибеден өткізіп те тұрамыз. Қысылтаяң кезде бетперде тігуді қолға алуды жөн санадық.
Елде төтенше жағдай жарияланған кезде бастапқыда күніне 2000-3000 бетперде тіккен. Дәл қазіргі сәтте 10000 бетперде дайын тұр. 15 адамды жұмыспен қамтып отыратын ательеде 1 данасын 70 теңгеден тігіп, аудандағы дәріханаларға ұсынуда. Одан бөлек, кез келген тапсырысты киім, перде сынды тұтынушылар қалауын орындайды.
Қазақтың ұлттық киімдері қыз-келіншектердің ажарын ашатыны сөзсіз. Алайда ою-өрнекпен өрнектелген ұлттық киімді тек Ұлыстың ұлы күні киетініміз жасырын емес. Тігінші Тоғжан осы олқылықтың орнын толтырып, қазақы нақыштағы киімдерді күнделікті киюге ыңғайлап тігуде.
Оның қолынан шыққан киім қонымды әрі жарасымды бола қалады. Ательеде ұлттық киімдер, той көйлектері, көрпе-көрпеше, қыз жасауы әзірленеді. Сонымен қатар, аудан өнерпаздарының сахналық киім үлгісін де ойластырады. Қысқасы, көңіл қалауыңыздағы дүниені ерекше дизайнмен үйлестіреді. Содан болар, халықтың таңдауы осы тігін ательесіне түседі.
– Тұтынушылардың сұранысын қанағаттандыру үшін үнемі ізденіс, тың идея қажет. Түстердің үйлесімділігі, адамның дене пішініне лайықты стиль, әдемі әшекей таңдаудың өзі үлкен жауапкершілікті қажет етеді. Ал киімді сәндеу ерекшелігін баса көрсетіп, бұйымды безендіріп әрлендіре түсетін таспаларды, бауларды, желбіршектер мен әдіптеулерді, жиектеулерді, бүрме, қатырма тігістерді қолдануды ателье тігіншілері жетік меңгерген. Қазіргі кезде дайын көйлекті сатып алғаннан гөрі, қазақы нақыштағы оюлар салынған киімдерге сұраныс көп, – дейді Тоғжан Мұсаева.
Алдағы уақытта үлкен тігін фабрикасын ашуды мақсат еткен ісмер өткен жылы 40 қыз-келіншекті жұмыспен қамту орталығы арқылы қысқа мерзімде оқытып, тігіншіліктің қыр-сырын үйреткен болатын. Ине ұстап, мата қиюды меңгерген олардың жартысынан көбі қайтарымсыз грант алып, жеке кәсіптерін бастап та кетті.
Жоғарыда атап өткендей ұлттық киімдерді қайта жаңғыртып, сұранысқа лайықтап қайта тігуді қолға алған «Тоғжан» ательесінің тігіншілері 1 күнде 10 дана көйлек тігіп шығады. Бағасы үлкендерге 15 мыңнан басталып 200 мыңға дейін барады. Ал кішкентайларға 8 мыңнан басталады. Баға дизайны мен матасына қарай қойылады. Талғам мен таңдау тұтынушылардың еркінде. Хакім Абай «Алдау қоспай адал еңбегін сауған қол өнері – қазақтың әулиесі сол» деп, қолөнермен айналысқан адамды жоғары бағалаған. Өйткені қолөнер жемісі сол адамның өзінің ғана әлеуметтік жағдайын жақсартпайды, көпшіліктің де кәдесіне жарайды.
Гүлнәр ДҮЙСЕБАЙ,
Шиелі ауданы
>>> Біздің Facebook, Instagram парақшаларымыз бен Telegram каналымызға жазылыңыз! <<<
