Сырдария шөгінді бассейнін зерттеу жұмыстары 2024 жылы басталып, 3 жылға жоспарланды. Ал «Саутс ойл» серіктестігі «Құмкөл» кен орнындағы «Қарағансай» учаскесінде дәстүрлі емес көмірсутекті игеру бойынша жұмысты қолға алды. Қазір шет елдерден мамандар тартылып, жаңа өндіру әдісі енгізілуде. Жоба бойынша тәулігіне 70 тонна мұнай өндіру күтілуде.
Басқарма Энергетика министрлігі облысқа бөлген сұйытылған мұнай газды операторларға бөліп, мониторинг жасайды.
Өткен жылы 88,8 мың тонна шамасында сұйытылған газ бөлінген, айына орта есеппен 7 мың тонна. Тиімді жұмыстың нәтижесінде қосымша 20 мың тонна газ бөлінді.
Экономиканы әртараптандыру үшін алдағы үш жылда 98 инвестициялық жоба жүзеге асырылып, 12 мыңнан аса жаңа жұмыс орны ашылады. Мәселен, «Қызылорда Саз-М» серіктестігінің автоматтандырылған кірпіш зауыты. Зауыт жылына 90 млн кірпіш шығарып, жергілікті құрылысқа қажетті сұраныстың 90 пайызын қамтамасыз етуде. «Қызылорда Нан» серіктестігінің нан өнімдері кешені іске қосылды.
Брифингте басқарма басшысы кәсіпкерлік және сауда бағыты бойынша да атқарылған іс тындырымды екенін айтты. Облыста кәсіпкерліктің даму қарқыны белсенді, шағын және орта бизнестің экономикадағы үлесі 20,5 пайыздан асты, 65 мыңнан аса кәсіпкер жұмыс істейді.
Мемлекеттік қолдау шараларының аймақта жүйелі әрі тиімді жүзеге асырылуы кәсіпкерлік саласындағы негізгі көрсеткіштердің өсімін қамтамасыз етті. Былтыр жеке кәсіпкерліктің 2 929 жобасына қаржылай қолдау көрсетілді. Оның ішінде, шағын және орта бизнестің 210 жобасы субсидияланып, 145 жобаға кепілдік берілді.
Елімізде қаржы институттары өңдеу өнеркәсібін дамытуға бағытталған «Өрлеу» бағдарламасын жүзеге асырып, бизнестің 49 жобасы қаржыландырылды. Ауылдық жерде микро және шағын бизнесті қолдауға бағытталған «Ауыл аманаты» жобасы аясында 388 жоба, «Қызылорда» өңірлік инвестициялық орталығы арқылы 86 жоба несиелендірілді.
Биыл жеке кәсіпкерлікті қаржылай қолдау үшін субсидиялау, кепілдендіру, жеңілдікпен несиелер беру құралдары қарастырылып, 543 жобаны қаржылай қолдау жоспарлануда.
Сондай-ақ Мемлекет басшысының тапсырмасына сәйкес «Іскер аймақ» шағын бизнесті қолдаудың бірыңғай бағдарламасы әзірленді. Бағдарлама аясында сыйақы мөлшерлемесінің бір бөлігін субсидиялау, шағын кәсіпкерлік субъектілеріне қаржылай емес және инфрақұрылымдық қолдау шараларын ұсыну көзделген. «Ауыл аманаты» және «Бір ауыл – бір өнім» бағдарламаларының аясында жүзеге асырылған жобаларды осы «Іскер аймақ» бағдарламасымен қаржыландыру арқылы кеңейту мүмкіндігі қарастырылған.
Басқарма «Атамекен» кәсіпкерлер палатасы, «Даму» қорымен бірлесіп, экономикалық қызметтердің басым тізбесін айқындау жұмыстарын жүргізуде. Жыл көлемінде кәсіпкерлікті дамыту және қолдауда даму институттарынан қаржы тарту шаралары атқарылады.
Үкімет бекіткен жол картасына сәйкес облыс орталығында 4 әмбебап базар жаңғыртылуда. Оның ішінде, «Сұлтан-2» базарының құрылысы толығымен аяқталып, техникалық режимде жұмыс жасауда. «Сыбаға» базарының 6 cауда қатары бұзылып, құрылыс алаңы дайындалып жатыр, «Талғат» және «Асбол» базарының құрылысы басталды.
Сара АДАЙБАЕВА,
«Сыр бойы»
