«Атасы жақсы, қандай-ды, асқар бір зәулім таудай-ды» деп шайырлар жырлағандай, перзенті үшін әкенің орны әркез бөлек. Жүріп өткен жолы ұрпағына өмірлік өнеге екен. Жүрегі кең, жүзі мейірімге толы, адал еңбегімен ел ішінде еңсесі биік, елеулі азамат болған ардақты әкеміз Рақым Жүнісұлы Көшкінбаевтың өмірден озғанына бір жыл толып отыр. Егер ортамызда болғанда 75 жасын тойлар едік, амал қанша? Соны ойласақ, жанымызды мұң торлап, жүрегімізді терең сағыныш қозғайды.
Әкеміз Рақым Жүнісұлы 1950 жылы Қызылорда қаласында дүниеге келген. С.Сейфуллин атындағы №4 мектептен орта білім алып шыққан. Біздің білуімізше, жастайынан білімге құштар әрі еңбекқор болған. Алдына үлкен мақсат қойып, өмірлік ұстанымын айқындай білген. Сол мақсатына сай мектеп бітірген жылы Жамбыл гидромелиоративтік-құрылыс институтына түсіп, инженер-гидротехник мамандығын алған. Бұл оның саналы ғұмырында еліне, туған жеріне еткен қалтқысыз қызметінің бастамасы десек болады.
Оқу бітіргеннен кейін құрылыс бөлшектер мен ағаш құрылымдарын шығаратын зауыттың бас инженері, ағаш шеберханасы цехының бас шебері болып еңбек жолын бастаған әкеміз көп ұзамай зауыттың цех бастығы болып жұмыс атқарған. «Қызылорда ремводстрой» ПМК-44 мекемесінде жиырма жылға жуық қызмет етіп, мастер, прораб, бөлімше бастығы, бас инженер қызметтерінен сатылап жоғарылап, 1994-1996 жылдары осы мекемеге басшылық жасаған. Ал 1998-2005 жылдар аралығында «Яксарт», «Яксарт Құрылыс» ЖШС директоры, Қазақстанның құрылысшылар одағы Қызылорда филиалының вице-президенті, «Промстройпроект» ААҚ-ның Ақтау қаласындағы бірлестігінде директордың орынбасары қызметтерін абыроймен атқарды.
Екі мыңыншы жылдардың басында «Асар Холдинг ЛТД», «РМЗ-Шапағат», «Казнефтегазмонтаж», «XXI ғасыр», «Ахат ГС» ЖШС сияқты құрылыс мекемелерінде қызмет атқарып, өңірдегі көптеген сәулетті нысанның салынуына өзіндік үлесін қосты.
Иә, қарап отырсақ, қырық жылдан аса еңбек жолында қарапайым шеберден бастап, жауапты қызметтер атқара жүріп, басшылық лауазымға дейін көтерілген. Ең бастысы, артында жақсы із қалдырып, адал еңбегімен абыройға бөленді. Басқарушылық пен іскерлік қабілетінен бөлек, қарапайымдылығымен халықтың құрметіне бөленді. Қай ортада жүрсе де, тәртіп пен талаптың, әділдік пен адамгершіліктің үлгісі болды.
Майталман маман ретінде облыс көлемінде жүргізілген қаншама құрылыс жұмыстарына атсалысып, сәулетті ғимараттардың салынуына үлесін қосты. Бүгінде қаланың әр бұрышында оның қолтаңбасы қалған нысандар ел игілігіне қызмет етуде.
Әкеміз заман талабына бейімделіп, тоқсаныншы жылдардың соңынан бастап жеке кәсіпкерлікпен айналысты. Сол кездегі нарықтың талабымен өмірге енген бұл саланы меңгеріп кету екінің бірінің қолынан келмейтін. Әйтсе де әкеміз қиындықтарға мойымай, ел экономикасы қаржы тапшылығына тірелген күрделі кезеңде отбасын қамтамасыз ете отырып, балаларын да еңбек етуге баулыды. Сонымен қатар, осы салада бірнеше буын жас маман тәрбиелеп, бағыт-бағдар берді. Кәсібін табысты жүзеге асыра білген әкеміз Рақым Жүнісұлы ел экономикасының дамуына да елеулі үлесін қосқанын айтып өткеніміз жөн болар.
«Адам ұрпағымен мың жасайды» дегендей, көзінің тірісінде үш баласын қатарынан қалдырмай, тәрбиелеп өсіріп, олардан немере сүйіп, анамыз екеуі отбасы бақытына кенелді. Бүгінде бәріміз өмірден өз жолымызды тауып, әкеміз салған ізбен әр салада қызмет етіп жүрміз.
Әкеміз қандай бір істі қолға алғанда, өте талапшыл, өзіне де, өзгеге де қатал болатын. Жұмыс барысында терең жауапкершілікті, тиянақтылықты талап ететін. Бірақ күнделікті тіршілікте жүрегі жұмсақ, көңілі кең, жақынына жанашыр, әсіресе, немерелеріне ерекше мейірбан болатын.
Зейнетке шыққан кезінде үйдің де, ауланың да сәнін келтіріп, бақша егуді қолға алды. Жайқалып өскен ағаштардың көлеңкесі жанға сая. Бүгінде атасы еккен бақшадан немерелері жеміс теріп жүр. Өмірдің сабақтастығы деген осы емес пе?! Біле білсек, әкеміздің бұл ісі – жай ғана еңбек емес, өмірді шын сүюдің, тіршіліктің әрбір сәтін бағалай білудің белгісі екен.
– Өкінбе әке, отың бар
сөнбейтұғын,
Ол мәңгілік жанады көрмей
тыным.
Ұрпағың бар, ел менен ер
намысын,
Тірі тұрса қолынан
бермейтұғын,
– деп Мұқағали ақын жырлағандай, артында қалған ұрпақтары әкеміздің атын абыроймен арқалап, өмірлік өнегесін үлгі тұтып, қалдырған ізін лайықты жалғап, туған жерге қызмет етуге бар күш-жігерімізді аянбай жұмсауға дайынбыз.
Ербол КӨШКІНБАЕВ
